នគរបាលព្រហ្មទណ្ឌខណ្ឌចំការមន ឃាត់ខ្លួនជនសង្ស័យ២នាក់ ដកហូតបាន១កាំភ្លើងដើម និងគ្រាប់ចំនួន៧គ្រាប់

នគរបាលព្រហ្មទណ្ឌខណ្ឌចំការមន ឃាត់ខ្លួនជនសង្ស័យ២នាក់ ដកហូតបាន១កាំភ្លើងដើម និងគ្រាប់ចំនួន៧គ្រាប់

ភ្នំពេញ ៖ ជនសង្ស័យ២នាក់ ត្រូវបានកម្លាំងនគរបាលព្រហ្មទណ្ឌខណ្ឌចំការមន ល្បាតក្នុងមូលដ្ឋាន ធ្វើការចាប់ឃាត់ខ្លួន ដកហូតបានកាំភ្លើងខ្លីម៉ាក K54 មានគ្រាប់ចំនួន៧ រួមទាំងសម្ភារៈកាច់សោកម៉ូតូមួយចំនួនទៀត ។ ការបង្ក្រាបនេះបានធ្វើឡើងកាលពីវេលាម៉ោង២ និង៣០នាទីរសៀល ថ្ងៃទី១៨ ខែមេសា ឆ្នាំ២០២០ ចំណុចផ្លូវ៤៣២ សង្កាត់បឹងត្របែក ខណ្ឌចំការមន រាជធានីភ្នំពេញ។

ជនសង្ស័យដែលឃាត់ខ្លួនបាន ទី១ឈ្មោះ សុខ ជា ភេទប្រុស អាយុ៤៥ឆ្នាំ ទីលំនៅមិនពិតប្រាកដ មុខរបររត់ម៉ូតូឌុប និងជនសង្ស័យទី២ឈ្មោះ សួន រ៉ាសុី ស្នាក់នៅបឹងកក់ ខណ្ឌដូនពេញ មុខរបរ រត់ម៉ូតូឌុប ។

ក្នុងនោះវត្ថុតាងដែលសមត្ថកិច្ចធ្វើការដកហូតបានរួមមាន អាវុធខ្លី១ដើម ម៉ាកK54 លេខ N0132116166ផលិតនៅប្រទេសចិន មានគ្រាប់ចំនួន៧គ្រាប់ ដែកសម្រាប់កាច់កម៉ូតូ ៦ដើម និងម៉ូតូស្មាស់១គ្រឿង ពាក់ស្លាកលេខ ភ្នំពេញ 1BL-9230។ មុននឹងឈានដល់ការចាប់ឃាត់ខ្លួនជនសង្ស័យខាងលើ កម្លាំងល្បាតនគរបាលព្រហ្មទណ្ឌខណ្ឌចំការមន បានល្បាតក្នុងភូមិសាស្ត្រ ហើយក៏ បានត្រួតពិនិត្យជនសង្ស័យ២នាក់ដែលកំពុងជិះម៉ូតូជិះចុះជិះទ្បើង ក៏រកឃើញវត្ថុតាងដូចបានរៀបរាប់ខាងលើតែម្តង ។

បច្ចុប្បន្នជនសង្សយ័ទាំង២នាក់ ត្រូវបានសមត្ថកិច្ចនាំខ្លួនមកកាន់អធិការខណ្ឌចំការមន ដើម្បីធ្វើការសាកសួរ និងកសាងសំណុំរឿងបញ្ជូនខ្លួនទៅកាន់តុលាការ ចាត់ការតាមច្បាប់បន្តទៀត៕