នគរបាលក្រុងតាខ្មៅឃាត់ខ្លួនក្មេងស្រីម្នាក់រួមជាមួយនឹងថ្នាំញៀនប្រភេទមេតំហ្វេតាមីន៩កញ្ចប់

កណ្ដាលៈ នគរបាលក្រុងតាខ្មៅ ធ្វើការបង្រ្កាបទីតាំងជួញដូរគ្រឿងញៀនមួយកន្លែង ឈានដល់ឃាត់ខ្លួនក្មេងស្រីអាយុ១៥ឆ្នាំម្នាក់ ក្នុងចំណោមបក្ខពួក៤នាក់ និងដកហូតថ្នាំញៀនប្រភេទមេតំហ្វេតាមីនហៅម៉ាទឹកកកចំនួន៩កញ្ចប់ ដើម្បីយកមកអធិការដ្ឋាននគរបាលក្រុងចាត់ការតាមច្បាប់ ។ ករណីនេះធ្វើឡើងនៅវេលាម៉ោង២២និង៣០នាទី ថ្ងៃទី៣ ខែធ្នូ ឆ្នាំ២០១៩ ត្រង់ចំណុចផ្ទះរបស់ឈ្មោះម៉ៅ ស្ថិតក្នុងភូមិលេខ១ សង្កាត់ស្វាយរលំ ក្រុងតាខ្មៅ ខេត្តកណ្តាល។
មន្រ្ដីនគរបាលក្រុងតាខ្មៅបានឲ្យដឹងថា ជនសង្ស័យចាប់ខ្លួនបានឈ្មោះ ម៉ៅ រស្មី ភេទស្រី អាយុ១៥ឆ្នាំ មុខរបរមិនពិតប្រាកដ មានស្រុកកំណើតនៅភូមិក្រសាំង ឃុំក្រសាំង ស្រុករមាសហែក ខេត្តស្វាយរៀង ។ បច្ចុប្បន្នស្នាក់នៅផ្ទះឈ្មោះ ម៉ៅ ស្ថិតក្នុងភូមិឃុំកើតហេតុ ។ ចំណែកជនសង្ស័យ៣នាក់ដែលរត់គេចខ្លួនទី១/ឈ្មោះ ម៉ៅ ទី២/ឈ្មោះ ភ័ក្រ និងទី៣/ឈ្មោះ ឡុង ។ ជនសង្ស័យទាំង៣នាក់នេះ មានទីលំនៅភូមិ/ឃុំកើតហេតុ ។ ក្នុងការចាប់ខ្លួននេះ សមត្ថកិច្ចបានធ្វើការដកហូតវត្ថុតាងថ្នាំញៀនចំនួន៩កញ្ចប់ធំល្មម ,ជញ្ជីងសំរាប់ថ្លឹងចំនួន១ និងឧបករណ៍សំរាប់ប្រើប្រាស់មួយចំនួនផងដែរ ។
ប្រភពដដែលបន្ដថា នៅមុនពេលកើតហេតុ កំលាំងនគរបាលផ្នែកប្រឆាំងគ្រឿងញៀនក្រុងតាខ្មៅបានទទួលព័ត៌មានច្បាស់ការថា មានជនសង្ស័យកំពុងជួញដូរគ្រឿងញៀននៅភូមិឃុំកើតហេតុខាងលើ ភ្លាមនោះក៏ធ្វើការសហការមួយកំលាំងនគរបាលប៉ុស្តិ៍ស្វាយរលំ រួចចុះទៅចំណុចកើតហេតុ ឃើញជនសង្ស័យមួយក្រុមកំពុងជួញដូរ និងប្រើប្រាស់គ្រឿងញៀន ភ្លាមនោះ កំលាំងសមត្ថកិច្ចបានចាប់ខ្លួនក្មេងស្រីម្នាក់ និងដកហូតថ្នាំញៀន៩កញ្ចប់ រួមទាំងវត្ថុតាងមួយចំនួនទៀតផងដែរ រួចយកមកអធិការដ្ឋាននគរបាលក្រុងដើម្បីកសាងសំណុំរឿងចាត់ការតាមច្បាប់ ។ ដោយឡែកជនសង្ស័យ៣នាក់ទៀត បានរត់គេចខ្លួនបាត់ស្រមោល ។
នៅចំពោះមុខសមត្ថកិច្ច ជនសង្ស័យឈ្មោះ ម៉ៅ រស្មី បានឆ្លើយសារភាពថា ថ្នាំញៀននេះពិតជារបស់ឈ្មោះ ភ័ក្រ ដែលយកមកអោយឈ្មោះ ម៉ៅ ដើម្បីលក់បន្តទៀត ៕