រថយន្តពីរគ្រឿងបុកគ្នាចំពីមុខពេញទំហឹង បណ្តាលឲ្យមនុស្ស៤នាក់ស្លាប់នៅនឹងកន្លែង

ខេត្តកោះកុង ៖ នៅ វេលាម៉ោង ១៤:៣៤​ នាទីរសៀល​ ថ្ងៃទី ០២ ខែធ្នូ ឆ្នាំ២០១៩នេះមានករណីគ្រោះថ្នាក់ចរាចរណ៍មួយកើតឡើង នៅលើផ្លូវជាតិលេខ៤៨ ចន្លោះបង្គោលគីឡូម៉ែត្រលេខ ៤៦-៤៧ ស្ថិតក្នុងភូមិប្រលាន ឃុំកណ្តោល ស្រុកបូទុមសាគរ ខេត្តកោះកុង បង្កឡើងដោយ​រថយន្ត ១​ គ្រឿង​FRONTIA កង់ ៦ មួយតោនកន្លះ ពណ៌ ស ពាក់ស្លាកលេខ ភ្នំពេញ ២AT ៦៤៣៩ ដឹកសាប៊ូ​ បើកបរទិសដៅពីផ្សារវាលរេញ កោះកុង ។ លុះមកដល់ចំណុចខាងលើមកក៏បែកកង់មុខខាងឆ្វេង រ៉េចង្កូតចូលផ្លូវនៃរថយន្ត ០១គ្រឿងទៀត​ ម៉ាកHYUNDAI ពណ៌ ស ពាក់ស្លាកលេខ ព្រះសីហនុ ៣A ៤០០០ បើកបរក្នុងទិសដៅផ្ទុយគ្នា បុកចំពីរមុខយ៉ាងពេញទំហុឹង បណ្តាលអោយស្លាប់មនុស្សប្រុសចំនួន ០៤នាក់ នៅខាងរថយន្តបង្ករ​ ។

ជនរងគ្រោះ​មានឈ្មោះ​ដូច​ខាង​ក្រោម​ ៖១-ឈ្មោះ សូ សំនាង ភេទ ប្រុស អាយុ ២៥ ឆ្នាំ ជនជាតិខ្មែរ មានទីលំនៅ ស្រុកកោះធំ ខេត្តកណ្តាល (ស្លាប់)​។ ២- ឈ្មោះ​ វីរៈ ភេទប្រុស អាយុ ៣៤ឆ្នាំ ជនជាតិខ្មែរ មានទីលំនៅខេត្តស្វាយរៀង (ស្លាប់) ។ ៤- ឈ្មោះ​ ស៊ាង គ្រី ភេទប្រុស អាយុ ៣០ឆ្នាំ ជនជាតិខ្មែរ មានទីលំនៅខេត្តកំពង់ចាម (ស្លាប់) ។ ៥- ឈ្មោះ​ ប៊ូ ប៊ុនថន ភេទប្រុស អាយុ ៣០ឆ្នាំ ជនជាតិខ្មែរ មានទីលំនៅស្រុកស៊ីធរកណ្តាល ខេត្តព្រៃវែង (ស្លាប់)។
ចំណែកអ្នកបើកបររថយន្ត HYUNDAI និងអ្នករួមដំណើរ បានរត់គេចខ្លួនបាត់ ពុំស្គាល់អត្តសញ្ញាណ ។ បច្ចុប្បន្ន​ សពជនរងគ្រោះ យើងបានយកមកតំកល់ទុកនៅវត្តអណ្តូងទឹក រងចាំ គ្រួសារសពមកទទួល ចំណែក​ឯ​ រថយន្តទាំងពីរគ្រឿងខាងលើ ខូចខាត ធ្ងន់ យើងយកមករក្សាទុកនៅអធិការដ្ឋាននគរបាលស្រុកបូទុមសាគរដើម្បីចាត់ការតាមនិតិវិធី ។