អាវុធម៉ាក AK មួយដើមត្រូវបានប្រជាពលរដ្ឋប្រទះឃើញនៅក្នុងស្រះទឹក

ភ្នំពេញ៖ លោកអធិការប៉ូលិសខណ្ឌដង្កោ បានដឹកនាំកម្លាំងរួមមានលោកនាយប៉ុស្ដិ៍ព្រៃវែង នាយរងប៉ុស្ដិ៍ រួមជាមួយមន្រ្តីប៉ុស្តិ៍​ ចុះចែកអត្តសញ្ញាណប័ណ្ណសញ្ជាតិខ្មែរជូនប្រជាពលរដ្ឋដល់ខ្នងផ្ទះ  ពេលមកដល់ភូមិកំរៀង សង្កាត់ព្រៃវែង ខណ្ឌដង្កោ នៅថ្ងៃសុក្រទី២២ ខែវិច្ឆិកា ឆ្នាំ​ ២០១៩ វេលាម៉ោង ៨និង៣០នាទី​ព្រឹកនេះ។

លោកវរសេនីយ៍ឯក ជឹម ស៉ីថា អធិការប៉ូលិសខណ្ឌដង្កោនិយាយថា ពេលនោះស្រាប់តែមានប្រជាពលរដ្ឋមករាយការណ៍ថា បានប្រទះឃើញអាវុធមួយដើម ច្រកក្នុងការុង នៅក្នុងស្រះទឹកក្បែរមណ្ឌលអប់រំកែប្រែព្រៃស ប្រហែល២០០ម៉ែត្រ។

ក្រោយពីទទួលបានព័ត៌មានភ្លាម លោកអធិការបានដឹកនាំកម្លាំងចុះទៅដល់ទីតាំង និងបានលើកយកការុងមកពិនិត្យមើលឃើញនៅក្នុងការុងមានអាវុធ ម៉ាកAKស្វាយវែង ១ដើម មានបង់៤ បង់ និងគ្រាប់ ១២០គ្រាប់  រួចយកមករក្សាទុកនៅប៉ុស្ដិ៍រដ្ឋបាលព្រៃវែងដើម្បីស្រាវជ្រាវបន្ត៕