ប៉ុស្តិ៍រដ្ឋបាលអូរបែកក្អម ឃាត់ជនសង្ស័យម្នាក់ ក្នុងចំណោម៣នាក់ ឆក់កាបូបប្រាក់
ភ្នំពេញ ៖ ប៉ុស្តិ៍រដ្ឋបាលអូរបែកក្អម បានឃាត់ខ្លួនជនសង្ស័យ ម្នាក់ ក្នុងចំណោម៣នាក់ ករណីលួចមានស្ថានទម្ងន់ទោស (ឆក់កាបូបមានប្រាក់) នៅចំណុចផ្លូវ២០០៤ ភូមិទ្រង់មាន់ សង្កាត់អូរបែកក្អម ខណ្ឌសែនសុខ កាលពីថ្ងៃទី៣០ ខែកញ្ញា ឆ្នាំ២០១៩ វេលាម៉ោង១៥ និង៣០នាទី។
តាមរបាយការណ៍បានឲ្យដឹងថា ជនសង្ស័យទាំងអស់មានគ្នា៣នាក់ ជិះម៉ូតូ២គ្រឿង ម៉ូតូម៉ាកនិចទាំង២គ្រឿង (គេចខ្លួន ២នាក់ មានឈ្មោះ វៃ និងឈ្មោះ ឆារ៉ា) ហើយជនសង្ស័យដែលសមត្ថកិច្ចឃាត់ខ្លួណឈ្មោះ ឈ្មោះ ទិត្យ សុខជា ភេទប្រុស អាយុ១៩ឆ្នាំ ជនជាតិខ្មែរ មុខរបរគ្មាន ស្នាក់នៅភូមិមច្ឆា សង្កាត់ស្ទឹងមានជ័យ ខណ្ឌមានជ័យ (មានសារធាតុញៀន)។
ជនរងគ្រោះ ឈ្មោះហ៊ូ សុផេង ភេទស្រី អាយុ២០ឆ្នាំ ជនជាតិខ្មែរ មុខរបរលក់គ្រឿងក្រអូប ស្នាក់នៅបន្ទប់ជួល ភូមិព្រៃព្រីងខាងជើង សង្កាត់ចោមចៅ ខណ្ឌពោធិសែនជ័យ ។ សម្ភារបាត់បង់រួមមាន ៖ កាបូបដៃចំនួន០១ប្រាក់ទឹកចំនួន២០០ដុល្លារ ; អត្តសញ្ញាណប័ណ្ណសញ្ញាតិខ្មែរចំនួន០១សន្លឹក ។
វត្ថុតាងចាប់យករួមមាន ៖ ម៉ូតូ១គ្រឿង ម៉ាកនិចពណ៌សលាយលឿង សេរី២០២០ គ្មានស្លាកលេខ និងទូរស័ព្ទ ម៉ាកហួវៃ(របស់ជនសង្ស័យ)។ បច្ចុប្បន្ន ជនសង្ស័យកំពុងឃាត់ខ្លួននៅអធិការដ្ឋាននគរបាលខណ្ឌសែនសុខ ដើម្បីអនុវត្តតាមនីតិវិធី៕
