ក្រុមជនសង្ស័យ តែងតែជិះដេញគប់ដុំថ្ម និងវាយប្លន់យកម៉ូតូយ៉ាងសកម្ម នៅចាក់អង្រែពេលយប់នោះ ត្រូវកម្លាំងនគរបាលព្រហ្មទណ្ឌកំរិតស្រាល ស្រាវជ្រាវបង្ក្រាបបាន ៤នាក់ហេីយ!
រាជធានីភ្នំពេញ ៖ កម្លាំងការិយាល័យនគរបាលព្រហ្មទណ្ឌកំរិតស្រាល នៃរាជធានីភ្នំពេញ ធ្វើការស្រាវជ្រាវឃាត់ខ្លួនបានជនសង្ស័យ ចំនួន៤នាក់ កាលពីថ្ងៃទី២៦ ខែកក្កដា ឆ្នាំ២០១៩នេះ ពាក់ព័ន្ធនឹងការប្រព្រឹត្តបទល្មើស អំពើលួចមានស្ថានទម្ងន់ទោស ដោយសារការប្រើអំពើហិង្សា (យកដុំថ្មគប់ និងយកខ្សែក្រវ៉ាត់វាយយកម៉ូតូ មិនបានសម្រេច) ចំនួន០៣ករណី ក្នុងនោះរួមមាន៖
ករណីទី១៖ អំពើលួចមានស្ថានទម្ងន់ទោស ដោយសារការប្រើអំពើហិង្សា (យកដុំថ្មគប់ចំក្បាលជនរងគ្រោះបណ្តាលឲ្យរងរបួស យកម៉ូតូមិនបានសម្រេច) ប្រព្រឹត្តនៅចំណុចមុខវិទ្យាល័យ ហ៊ុនសែន ចាក់អង្រែ ផ្លូវជាតិលេខ២ ក្រុម១៤ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃទី២ ខែមិថុនា ឆ្នាំ២០១៩ វេលាម៉ោង២ទៀបភ្លឺ ដោយជនរងគ្រោះមានឈ្មោះ វ៉ន ពិសិដ្ឋ ភេទប្រុស អាយុ១៧ឆ្នាំ ស្នាក់នៅផ្ទះលេខ៧៩អា ផ្លូវលំ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរជាងជួសជុលទូរសព្ទ័ រងរបួសបែកក្បាលពីក្រោយធ្ងន់ធ្ងរ។
ករណីទី២ ៖ អំពើលួចមានស្ថានទម្ងន់ទោស ដោយសារការប្រើអំពើហិង្សា (យកដុំថ្មគប់ និងយកខ្សែក្រវ៉ាត់វាយយកម៉ូតូចំនួន ០២ គ្រឿង មិនបានសម្រេច) ប្រព្រឹត្តនៅចំណុចមុខគ្លីនិកចាក់អង្រែ (គ្លីនិក២១៥) ផ្ទះលេខ៥៦ ផ្លូវជាតិលេខ២ ក្រុម១២ ភូមិទួលរកា សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃទី០១ ខែកក្កដា ឆ្នាំ២០១៩ វេលាម៉ោង៥និង១០នាទីព្រឹក ដោយជនរងគ្រោះឈ្មោះ ចៅ សុផាន់ណា ភេទប្រុស អាយុ២៣ឆ្នាំ ស្នាក់នៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល មុខរបរសន្តិសុខ, និងឈ្មោះ ជូ វណ្ណឌី ភេទប្រុស អាយុ ១៨ឆ្នាំ ស្នាក់នៅបុរីពីភពថ្មី ផ្លូវជាតិលេខ២ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ មុខរបរ សន្តិសុខ។
ករណីទី៣ ៖ អំពើលួចមានស្ថានទម្ងន់ទោសដោយសារការប្រើអំពើហិង្សា (យកដុំថ្មគប់យកម៉ូតូមិនបានសម្រេច) ប្រព្រឹត្តនៅចំណុចមុខប៉ុស្តិ៍នគរបាលរដ្ឋបាលចាក់អង្រែក្រោម ផ្លូវជាតិលេខ២ ក្រុម២១ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ កាលពីថ្ងៃទី១៤ ខែកក្កដា ឆ្នាំ២០១៩ វេលាម៉ោង០១:៤០នាទី ដោយជនរងគ្រោះមានឈ្មោះ ប៊ែល គឹមហោ ភេទប្រុស អាយុ១៩ឆ្នាំ ស្នាក់នៅផ្ទះលេខ២៥ ផ្លូវលំ ក្រុម២១ ភូមិទួលរកា១ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ មុខរបរសិស្ស។
ក្នុងនោះ ជនសង្ស័យដែលសមត្ថកិច្ចឃាត់ខ្លួនបានរួមមាន៖
១-ឈ្មោះ ទូច ប្រុស ភេទប្រុស អាយុ២២ឆ្នាំ ជនជាតិខ្មែរ មុខរបរ លក់ខោអាវ ស្នាក់នៅផ្ទះលេខ៤៦២ ផ្លូវលេខ៣៦៩ សង្កាត់ព្រែកថ្មី ខណ្ឌ ច្បារអំពៅ រាជធានីភ្នំពេញឃាត់ខ្លួនកាលពីវេលាម៉ោង០៩:៣០នាទី ថ្ងៃទី២៦ ខែកក្កដា ឆ្នាំ២០១៩ នៅចំណុចមុខសាលមហោស្របកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
២-ឈ្មោះ ចាន់ ពិសាក់ ភេទប្រុស អាយុ១៩ឆ្នាំ ជនជាតិខ្មែរ មុខរបរ ជាងធ្វើតុទូ ស្នាក់នៅផ្ទះមិនចាំលេខ ផ្លូវបេតុង ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ឃាត់ខ្លួនកាលពីវេលាម៉ោង០៩:៣០នាទី ថ្ងៃទី២៦ ខែកក្កដា ឆ្នាំ២០១៩ នៅចំណុចមុខសាលមហោស្របកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
៣-ឈ្មោះ ថា សុខហេង ភេទប្រុស អាយុ១៨ឆ្នាំ ជនជាតិខ្មែរ មុខរបរ ជាងដែក ស្នាក់នៅផ្ទះមិនចាំលេខ ផ្លូវលំ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ឃាត់ខ្លួនកាលពីវេលាម៉ោង០៩:៣០នាទី ថ្ងៃទី២៦ ខែកក្កដា ឆ្នាំ២០១៩ នៅចំណុចមុខសាលមហោស្របកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
៤-ឈ្មោះ យាង ផាណេត ហៅ ចយ ភេទប្រុស អាយុប្រហែល ២២ ឆ្នាំ មុខរបរ មិនពិតប្រាកដ ស្នាក់នៅផ្ទះលេខ៧១១អា ផ្លូវលេខ១១២ ភូមិចំពុះក្អែក សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ឃាត់ខ្លួនថ្ងៃទី២៧ ខែកក្កដា ឆ្នាំ ២០១៩ វេលាម៉ោង៩យប់ នៅចំណុចមជ្ឈមណ្ឌលព្យាបាលអប់រំដោយសារធាតុញៀនគ្រប់ប្រភេទ នៃសមាគមសង្គ្រោះជនរងគ្រោះដោយគ្រឿងញៀនកម្ពុជា មានទីតាំងស្ថិតនៅឃុំទ្រា ស្រុកស្អាង ខេត្តកណ្តាល ។
វត្ថុតាងចាប់យក ដុំថ្មការ៉ូឡា ចំនួន ០៣ ដុំ។
បច្ចុប្បន្នជនសង្ស័យ និងវត្ថុតាងខាងលើ ត្រូវបានកម្លាំងការិយាល័យព្រហ្មទណ្ឌកម្រិតស្រាល កសាងសំណុំរឿងបញ្ជូនទៅសាលាដំបូងរាជធានីភ្នំពេញ ដេីម្បីចាត់ការតាមនីតិវិធីច្បាប់៕ ដោយបងម៉េង
