អគ្គីភ័យឆាបឆេះផ្ទះលក់សាំង១ខ្នង នៅសង្កាត់ទួលទំពូង២
អគ្គីភ័យឆាបឆេះផ្ទះលក់សាំង១ខ្នង នៅសង្កាត់ទួលទំពូង២
ភ្នំពេញ ៖ អគ្គីភ័យបានឆាបឆេះផ្ទះលក់សាំង និងប្តូរប្រេងម៉ាស៊ីន បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ច បានហៅរថយន្តពន្លត់អគ្គិភ័យចេញមកអន្តរាគមន៍ជាច្រើនគ្រឿង។
ហេតុការណ៍បានកើតឡើងនៅម៉ោងជាង៣រសៀលថ្ងៃទី១៣ ខែមិថុនា ឆ្នាំ២០១៩ នៅចំណុចផ្ទះលក់សាំង និងប្តូរប្រេងម៉ាស៊ីន ស្ថិតនៅតាមផ្លូវលេខ៤៣០កែងផ្លូវលេខ៤៨០សង្កាត់ទួលទំពូង២ ខណ្ឌចាំការមន រាជធានីភ្នំពេញ ។
ក្នុងហេតុការណ៍នេះ មានរថយន្តពន្លត់អគ្គីភ័យស្នងការរាជធានីជាច្រើនគ្រឿងកំពុងចេញជួយអន្តរាគមន៍បាញ់ពន្លត់ ។
តាមសេចក្តីរាយការណ៍ពីសមត្ថកិច្ចជាបឋម បានឲ្យដឹងថា ករណីបង្កឲ្យមានអគ្គីភ័យឆាបឆេះនេះ គឺបណ្តាលមកពីជាងផ្សារដែកខ្វះការប្រុងប្រយ័ត្ន ទើបបង្កមានអណ្តាតភ្លើងឆេះតែម្តង ។ នៅម៉ោងជាង៤រសៀលថ្ងៃដដែល អគ្គិភ័យត្រូវបានសមត្ថកិច្ចគ្រប់គ្រងបាន១០០ភាគរយ ។
នៅក្នុងប្រតិបត្តិការនេះដែរ មានរថយន្តពន្លត់អគ្គិភ័យ១៨គ្រឿង ចេញមកអន្តរាគមន៍ ។ នៅក្នុងហេតុការណ៍នេះដែរ បណ្តាលឲ្យក្រុមអ្នកពន្លត់អគ្គិភ័យរងរបួស២នាក់ ឆេះម៉ូតូ១គ្រឿង និងឆេះសម្ភារៈនៅក្នុងផ្ទះទាំងស្រុង ៕
