ចិនបង្កគ្រោះថ្នាក់ចរាចរណ៍,ឆែកឃើញគ្រឿងញៀនមួយចំនួន

ភ្នំពេញ៖ ហេតុការណ៍គ្រោះថ្នាក់ចរាចរណ៍នេះបានកើតឡើងនៅរសៀលថ្ងៃទី០៣  ខែមិថុនា  ឆ្នាំ២០១៩ ស្ថិតនៅចំណុចស្តុបរោងកុនលុច  តាមបណ្តោយមហាវិថីព្រះនរោត្តម  កែងផ្លូវលេខ១៥៤  ក្នុងសង្កាត់ផ្សារថ្មី៣  ខណ្ឌដូនពេញ   បង្កដោយបុរសជាជនជាតិចិនម្នាក់ក្រោយពីបង្កគ្រោះថ្នាក់ចរាចរណ៍រួចមកក៏បានបើករថយន្តរត់គេចចេញពីកន្លែងកើតហេតុដោយមិនទទួលខុសត្រូវអ្វីទាំងអស់ភ្លាមនោះប្រជាពលរដ្ឋបាននាំគ្នាដេញតាមឃាត់ខ្លួនជនបង្កតែម្តង។

តាមប្រភពព័ត៌មានពីកន្លែងកើតហេតុបានប្រាប់ឲ្យដឹងថានៅមុនពេលកើតហេតុគេឃើញបុរសម្នាក់និងស្ត្រីម្នាក់បានជិះរ៉ឺម៉កកង់បីឥណ្ឌាពណ៌ក្រហមពាក់ស្លាកលេខព្រៃវែង1M-1574 ធ្វើដំណើរតាមបណ្ដោយមហាវិថីព្រះនរោត្តមទិសដៅពីកើតទៅលិចបានឈប់រងចាំស្តុបខណៈនោះស្រាប់តែមានរថយន្តមួយគ្រឿងម៉ាកLexus RX350 ពណ៌ខ្មៅពាក់ស្លាកលេខភ្នំពេញ2AW-4332 បើកបរដោយបុរសជនជាតិម្នាក់បានធ្វើដំណើរមកពីក្រោយបុកពេញទំហឹងអូសរ៉ឺម៉កកង់បីជាច្រើនម៉ែត្របណ្ដាលឲ្យក្រឡាប់រងរបួសធ្ងន់ត្រូវបានបញ្ជូនទៅកាន់មន្ទីរពេទ្យភ្លាមៗផងដែរ។

ក្រោយពេលកើតហេតុរថយន្តបង្កបានព្យាយាមបើករត់គេចរហូតដល់ចំណុចផ្សារតាប៉ាងផ្លូវលេខ១៣៦ក៏ត្រូវបានប្រជាពលរដ្ឋដេញឃាត់រថយន្តខាងលើបានតែម្តង។ដោយនៅក្នុងករណីគ្រោះថ្នាក់ចរាចរណ៍នេះបងប្អូនប្រជាពលរដ្ឋបានប្រើហិង្សាទៅជនបង្កវ៉ៃម្នាក់មួយដៃមួយជើងទើបបណ្ដាលឲ្យរងរបួសបែកមាត់។

បន្ទាប់មកកម្លាំងសមត្ថកិច្ចខណ្ឌបានចុះមកដល់កន្លែងកើតហេតុរួចនាំយកជនបង្កខាងលើទៅកាន់អធិការនគរបាលខណ្ឌដូនពេញស្រាប់បានប្រទះឃើញគ្រឿងញៀនជាច្រើនគីឡូនៅក្នុងកាបូបរបស់ជនបង្ក។

ពាក់ព័ន្ធករណីខាងលើនេះភ្នាក់ងាយយើងពុំអាចសាកសួរលោកអធិការរងទទួលផ្នែកគ្រឿងញៀនខណ្ឌដោយលោកបានបញ្ជាក់ថានៅពេលនេះកម្លាំងសមត្ថកិច្ចរបស់លោកកំពុងតែធ្វើការសាកសួរនិងតាមចាប់ខ្លួនបក្ខពួកបន្តទៀតខណៈដែលចំនួនគ្រឿងញៀនពិតប្រាកដលោកមិនទាន់ដឹងថាប៉ុន្មាននោះទេ៕