តុលាការចេញដីកាឃុំខ្លួនខ្មាន់កាំភ្លើងបាញ់នារីម្នាក់របួសភ្លៅនៅក្លឹបលុច្សសារី
ភ្នំពេញ៖ ចៅក្រមស៊ើបសួរលោកថាន់ឡេងនៅរសៀ លថ្ងៃទី៣១ខែឧសភាឆ្នាំ២០១៩បានចេញដីការបង្គាប់ឲ្យនាំខ្លួនខ្មាន់កាំភ្លើងបាញ់នារីម្នាក់បាក់ភ្លៅដាក់ពន្ធ នាគារPJ ដើម្បីរង់ចាំការជំនុំជម្រះទោសទណ្ឌនៅ ពេលក្រោយ ។
លោកស្រី ស៊ឺ វណ្ណនី ព្រះរាជអាជ្ញារងអមសាលា ដំបូងរាជធានីភ្នំពេញសម្រេចចោទប្រកាន់ជនសង្ស័យឈ្មោះវីនសុក្របញ្ញាពីបទប៉ុនប៉ងឃាតកម្មតាមមាត្រា ២៧ និង មាត្រា ១៩៩ នៃក្រមព្រហ្មទណ្ឌដែលអាចប្រឈមមុខនឹងការជាប់ពន្ធនាគារពី១០ឆ្នាំទៅ១៥ឆ្នាំ។
ការបញ្ជូនខ្លួនជនសង្ស័យ និងសំណុំរឿងទៅតុលាការនេះធ្វើឡើងបន្ទាប់ពីលោកជំទាវ ញ៉ែម មរកត នាំខ្លួនកូនប្រុសដែលជាជនសង្ស័យទៅសារភាពកំហុសចំពោះមុខសមត្ថកិច្ចកាលពីរសៀលថ្ងៃទី២៩ ខែ ឧសភា ឆ្នាំ២០១៩ ។
សូមបញ្ជាក់ថានារីម្នាក់ត្រូវបានក្រុមជនសង្ស័យ បានដកកាំភ្លើងបាញ់ចំភ្លៅខាងស្តាំមួយគ្រាប់ បណ្ដាលឲ្យរងរបួធ្ងន់កាលពីថ្ងៃទី២៨ ខែឧសភា ឆ្នាំ២០១៩ វេលាម៉ោង០២នឹង២០នាទីរំលងអាធ្រាត្រ ក្នុងក្លឹបលុច្សសារី ផ្ទះលេខ៥៣ ផ្លូវ២១៤ ភូមិ៥ សង្កាត់បឹងរាំង ខណ្ឌ ដូនពេញ រាជធានីភ្នំពេញ ។
បើតាមរបាយការណ៍របស់សមត្ថកិច្ចបានឲ្យដឹងជនរងគ្រោះឈ្មោះ នឹម លីណា ភេទស្រីអាយុ២៩ឆ្នាំ មុខ របរ លក់ដូរ ទីលំនៅផ្ទះលេខ៥៣ ផ្លូវ៣៣៨ សង្កាត់ទួលស្វាយព្រៃទី១ ខណ្ឌចំការមន ។ ចំណែកជន សង្ស័យមានឈ្មោះវីនសុក្របញ្ញាអាយុ២៧ឆ្នាំ មានទីលំនៅម្ដុំសង្កាត់វាលវង់ ខណ្ឌ៧មករា រាជធានីភ្នំពេញ ។
មហាជនបានលើកជាចម្ងល់ថា ហេតុអ្វីក្លឹបកម្សាន្ត លុច្សសារី អនុញ្ញាតឲ្យក្រុមជនសង្ស័យមានសិទ្ធិយកកាំភ្លើងចូលទៅខាងក្នុងបាន រហូតអាចបាញ់បោះសេរីបណ្តាលឲ្យមានអ្នករងរបួសបែបនេះ? តើអាជ្ញាធរពាក់ព័ន្ធនឹងចាត់វិធានការផ្លូវច្បាប់យ៉ាងណាចំពោះក្លឹបកម្សាន្តលុច្សសារីបន្ទាប់មានសកម្មភាពបាញ់បោះសេរីបែបនេះ?
