ភ្លៀងលាយលំជាមួយខ្យល់កន្ត្រាក់ បោកបក់បេីងតំបូលស័ង្កសីឃ្លាំងដ៏ធំ ហោះធ្លាក់មកសង្កត់មនុស្ស៣នាក់ និងយានយន្តជាច្រេីនទៀត
រាជធានីភ្នំពេញ ៖ ខណៈកំពុងមានភ្លៀងធ្លាក់ខ្លាំង លាយលំជាមួយខ្យល់កន្ត្រាក់បោកបក់មក បានធ្វេីឲ្យបេីងតំបូលស័ង្កសី ការដ្ឋានសំណង់មួយកន្លែង បេីងហោះទៅធ្លាក់លេីទីធ្លាក្បែរនោះ សង្កត់លេីមនុស្ស បណ្ដាលឲ្យមនុស្ស៣នាក់រងរបួសធ្ងន់និងស្រាល និងសង្កត់ចំរថយន្ត២គ្រឿង និងម៉ូតូមួយគ្រឿងទៀត ជាប់ក្រោមតំបូលដ៏ធំនោះ បង្កឲ្យមានការភ្ញាក់ផ្អើលក្រុមកម្មករនាំគ្នាជួយសង្គ្រោះ យកមកកន្លែងរាយការណ៍ប្រាប់សមត្ថកិច្ចមូលដ្ឋាន ចុះទៅកន្លែងកេីតហេតុ និងទាក់ទងរថយន្តសង្គ្រោះបន្ទាន់មកដឹកជនរងគ្រោះយកទៅសង្គ្រោះផងដែរ។
គ្រោះធម្មជាតិខ្យល់កន្ត្រាក់នេះ បានកេីតឡេីងកាលពីវេលាម៉ោង០១:២០នាទីរសៀល ថ្ងៃសុក្រ ទី១០ ខែឧសភា ឆ្នាំ២០១៩នេះ នៅចំណុចរោងចក្រមួយកន្លែង នៅជិតផ្លូវបេតុង៥០ម៉ែត្រ ស្ថិតក្នុងភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ។
សមត្ថកិច្ចមូលដ្ឋានបានប្រាប់ឲ្យដឹងថា ដំបូលស័ង្កសីដែលប៉ើងនេះមានទំហំ ប្រហែល ២,៩៧០ ម៉ែត្រការេ ទទឹង៣៣ម៉ែត្រ បណ្ដាយ៩០ម៉ែត្រឯណោះ ដោយមានម្ចាស់ឃ្លាំងឈ្មោះ អ៉ឹង ប៊ុនប៉េង ត្រូវបានភ្លៀង លាយឡំនឹងខ្យល់កន្ត្រាក់ ប៉ើងសង្កត់លើរថយន្ត២គ្រឿង និងម៉ូតូ១គ្រឿង ក្នុងនោះមានរថយន្តស្ទូចដែក ១គ្រឿង រថយន្តម៉ាកធុនត្រា ១គ្រឿង និងម៉ូតូសង់០១០ ចំនួន១គ្រឿង បណ្តាលឲ្យរងការខូចខាត និងសង្កត់ចំមនុស្សចំនួន៣នាក់បណ្ដាលឲ្យរងរបួសធ្ងន់និងស្រាល ភ្លាមៗនោះត្រូវបានបងប្អូនកម្មករនៅទីនោះ នាំគ្នាជួយសង្គ្រោះយកមកកន្លែងមានសុវត្ថិភាព និងរាយការណ៍ប្រាប់សមត្ថកិច្ចមូលដ្ឋាន ហៅរថយន្តសង្គ្រោះមកដឹងយកទៅសង្គ្រោះផងដែរ។
ជនរងគ្រោះមាន ទី១.ឈ្មោះ អេង ធី ភេទប្រុស អាយុ៣៣ឆ្នាំ មុខរបរកម្មករធ្វើឃ្លាំង ។ ទី២.ឈ្មោះ យូរ ផុត ភេទប្រុស អាយុ៤៥ឆ្នាំ មុខរបរកម្មករ ។ និងទី៣ មិនទាន់ស្គាល់អត្ដសញ្ញាណនោះទេ ហើយជនរងគ្រោះទាំង៣នាក់ ត្រូវបានបញ្ជូនតាមរថយន្តសាមុយរបស់មន្ទីរពេទ្យសួគ៌ា ទៅសង្គ្រោះបន្ទាន់នៅមន្ទីរពេទ្យ។
បច្ចុប្បន្នក្រោយពេលកេីតហេតុ រថយន្តនិងម៉ូតូដែលត្រូវបានតំបូលស័ង្កសីនោះសង្កត់ជាប់និងរងការខូចខាត មិនទាន់ដឹងថាដោះស្រាយយ៉ាងណានោះទេ៕
