ប្រពន្ធសរសៃខ្ចី ប្តីបានដៃឆ្លៀតលួចទៅឆីព្រហ្មចារីយ៍ នារីកម្មករ និយាយលែងចេញ ខាងប្រុសប៉ុនប៉ងដោះដៃ ខាងស្រីឈឺចិត្ត!
រាជធានីភ្នំពេញ ៖ ស្ត្រីជាកម្មការនីរោងចក្រម្នាក់ ចាញ់ល្បិចបោកប្រាស់ ខាតបង់ខ្លួនប្រាណដោយ នឹកស្មានតែកំលោះដូចពាក្យថា ស្គាល់ធ្លាប់នៅជាមួយគ្នាបាន៦ខែមានកូន ស្រាប់តែលេចមុខប្រពន្ធមកជ្រងោៗ ទើបភ្ញាក់ខ្លួន និយាយលែងចេញ ខាងប្រុសប៉ុនប៉ងដោះដៃ ខាងស្រីឈឺចិត្ត ដើររកកន្លែងប្តឹង ដើម្បីឲ្យទទួលខុសត្រូវ កាលពីរសៀលថ្ងៃទី៣០ ខែមិនា ឆ្នាំ២០១៩ នៅក្នុងសាលាសង្កាត់ចោមចៅ៣ ខណ្ឌពោធិសែនជ័យ រាជធានីភ្នំពេញ។
ស្ត្រីអភ័ព្វស្នេហ៍ មានឈ្មោះ ឃួន ចាន់នី អាយុ២៩ឆ្នាំ កម្មការនីរោងចក្រ អតីតជាសិស្សវិលត្រឡប់មកពីប្រទេសជប៉ុន មានទីលំនៅភូមិឫស្សី សង្កាត់ស្ទឹងមានជ័យ៣ ខណ្ឌមានជ័យ មានស្រុកកំណើត ភូមិតាងួន សង្កាត់កាកាប ខណ្ឌពោធិសែនជ័យ ។
ចំណែកបុរសចិត្តអប្រិយ ត្រូវបានស្ត្រីខាងលើអះអាងថាឈ្មោះ ឈុំ ស៊ុនលី អាយុ២៨ឆ្នាំ បម្រើការងារ នៅការិយាល័យមេធាវី នៅក្នុងខណ្ឌចំការមន មានទីលំនៅភូមិព្រៃព្រីងជើង សង្កាត់ចោមចៅ៣ ខណ្ឌពោធិសែនជ័យ ។
តាមស្ត្រីខាងលើ ដែលវត្តមាននៅសាលាសង្កាត់ចោមចៅ៣ បានរៀបរាប់ទាំងហួសចិត្តថា ក្រោយពីនាងវិលត្រឡប់មកពីរៀននៅប្រទេសជប៉ុនវិញ បានស្គាល់បុរសកំហូចម្នាក់ខាងលើតាមរយៈលេងហ្វេសប៊ុក ដែលអះអាងថាខ្លួនបម្រើការងារនៅការិយាល័យមេធាវីមួយកន្លែង ថែមទាំងប្រាប់ថា រូបគេនៅកំលោះចេស មិនទាន់មានប្រពន្ធទេ សុំស្នេហ៍ សុំស្រឡាញ់ ស្គាល់នឹងជួយរកការងារឲ្យធ្វើ បានជាកម្មការនីរោងចក្រ អស់រយៈពេល៦ខែកន្លងមកហើយ។
