នគរបាលជំនាញធ្វើការពិនិត្យសាកសាពនារីម្នាក់ស្លាប់ដោយអំពើឃាតកម្ម
កណ្ដាលៈ នគរបាលជំនាញស្រុកមុខកំពូល សហការជាមួយនគរបាលខេត្តកណ្ដាល ចុះធ្វើការពិនិត្យសាកសពនារីម្នាក់ស្លាប់នៅក្នុងប្រឡាយព្រុំដីក្នុងព្រៃមួយកន្លែង ដែលសង្ស័យថាជាអំពើឃាតកម្ម ។ ករណីខាងលើនេះបង្កការភ្ញាក់ផ្អើលឡើងនៅរសៀលថ្ងៃទី៨ ខែមិនា ឆ្នាំ២០១៩ នៅភូមិក្រោលគោ ឃុំសំបួរមាស ស្រុកមុខកំពូល ខេត្តកណ្តាល។
មន្ត្រីនគរបាលស្រុកមុខកំពូលបានឲ្យដឹងថា សាកសពនារីរងគ្រោះឈ្មោះ នៅ ស្រីលាប អាយុ១៨ឆ្នាំ មានទីលំនៅភូមិព្រែកឬស ឃុំសំបួរមាស ស្រុកមុខកំពូល ។
ប្រភពដដែលបន្តថា នៅមុនពេលកើតហេតុ មានប្រជាពលរដ្ឋឈ្មោះ ពឿន ភេទប្រុស អាយុ៣៥ឆ្នាំ មុរបរកសិករនៅភូមិក្រោលគោ ឃុំសំបួរមាស គាត់បានជិះម៉ូតូមករាយមង នៅចំណុចបឹងក្របីស្លាប់ ខណៈមកដល់មាត់បឹងមិនឃើញទូកនៅមាត់បឹង ក៏ជិះម៉ូតូត្រឡប់មកវិញ ស្រាប់តែឃើញកាតាបខ្មៅមួយ នៅក្បែរផ្លូវឈប់ចុះមកមើល ស្រាប់តែឃើញសាកសពស្លាប់ក្នុង ប្រឡាយព្រុំដីក្នុងព្រៃ ភ្លាមនោះបង្កការភ្ញាក់ផ្អើលដល់ប្រជាពលរដ្ឋជិតខាង និងនគរបាលជំនាញ ចុះកន្លែងកើតហេតុធ្វើការកោសល្យធ្វិច្ច័យ រួចបញ្ជាក់ថា ការស្លាប់នារីរងគ្រោះគឺជាករណីឃាតកម្ម ។ ចំពោះករណីនេះ នគរបាលជំនាញកំពុងធ្វើការស្រាវជ្រាវស៊ើបអង្គេតរកមូលហេតុពិត និងតាមចាប់ជនដៃដល់ដើម្បីចាត់ការតាមច្បាប់ ៕
