លួចម៉ូតូបានហើយ ត្រឡប់ទៅយកម៉ូតូខ្លួនវិញត្រូវជនរងគ្រោះចាប់ជាប់
ភ្នំពេញ ៖ ជនសង្ស័យក្នុងមុខសញ្ញាលួចម៉ូតូម្នាក់ ត្រូវបានម្ចាស់ម៉ូតូជាជនរងគ្រោះឃាត់ខ្លួនប្រគល់ឲ្យសមត្ថកិច្ច ខណៈជនសង្ស័យត្រឡប់មកយកម៉ូតូរបស់ខ្លួនដែលទុកចោលនៅខាង ក្រោយផ្ទះជនរងគ្រោះ ។
ជនសង្ស័យឈ្មោះ ណេង សាវិត ភេទ ប្រុស អាយុ២៣ឆ្នាំ ជនជាតិខ្មែរ មុខរបរ មិនពិតប្រាកដ ស្នាក់នៅភូមិអូរអណ្តូង សង្កាត់ព្រែកប្រា ខណ្ឌច្បារអំពៅ បានធ្វើសកម្មភាពទាញក្តារឈើជញ្ជាំងផ្ទះឲ្យរបើកលួចម៉ូតូ កាបូបលុយ និងទូរស័ព្ទដៃ របស់ជនរងគ្រោះនៅផ្ទះគ្មានលេខ ផ្លូវបេតុង ភូមិព្រែកថ្មី សង្កាត់ព្រែកថ្មី ខណ្ឌច្បារអំពៅ នៅថ្ងៃទី០៧ ខែមីនា ឆ្នាំ២០១៩ វេលាម៉ោងប្រមាណ៣និង០០នាទីព្រឹក ។
បន្ទាប់ពីឃាត់ខ្លួនជនសង្ស័យបានហើយ សមត្ថកិច្ចក៏នាំជនសង្ស័យទៅយកម៉ូតូរបស់ជនរងគ្រោះទុកនៅកន្លែងផ្ញើម៉ូតូមន្ទីរពេទ្យរុស្ស៊ីមកវិញ ទុកធ្វើជាវត្ថុតាង។
បច្ចុប្បន្ន សមត្ថកិច្ចជំនាញកសាងសំណុំរឿងអនុវត្តតាមនីតិវិធី ៕
