រន្ធត់ទៀតហើយនៅ ផ្លូវបំបែកស្រែអំបិលរថយន្តបែនដឹកថ្ម ក្រឡាប់កិនរថយន្ដCRV ដែលចតនៅចិញ្ចើមផ្លូវ កិនស្លាប់ប្តីក្នុងរថយន្តដែលកំពុងអង្គុយចាំប្រពន្ធនិងកូនចុះទៅទិញនំចំណី
ខេត្តព្រះសីហនុ៖ព័ត៌មានប្រចាំថ្ងៃ របស់ស្នងការដ្ឋាននគរបាលខេត្តព្រះសីហនុ បានឲ្យដឹងថាៈ វេលាម៉ោងប្រមាណ៩:៤០នាទីព្រឹកថ្ងៃទី១៧ ខែកុម្ភៈ ឆ្នាំ២០១៩ នេះ មានគ្រោះថ្នាក់ចរាចរណ៍ ដ៏រន្ធត់មួយ កេីតឡេីង នៅផ្លូវជាតិលេខ៤ ចន្លោះគីឡូម៉ែត្រ ១៤០-១៤១ (ផ្លូវបំបែកស្រែអំបិល) ភូមិចំការហ្លួង ឃុំចំការហ្លួង ស្រុកកំពង់សិលា ខេត្តព្រះសីហនុ បង្កដោយរថយន្តបែនដឹកថ្ម១គ្រឿងម៉ាក HYUNDAI ពណ៌ស ផ្លាកលេខ កំពង់ធំ3A-1369 មានទិសចេញពីស្រុកស្រែអំបិល មកផ្លូវជាតិលេខ៤ ពេលចុះចំណោត ហ្វ្រាំងមិនស៊ី បានមកបុកនឹងរថយន្ត CRV ១គ្រឿងដែលឈប់ចតនៅចិញ្ចើមផ្លូវ បណ្តាលណ្ដាលឲ្យក្រឡាប់សង្កត់ពីលើតែម្ដង រថយន្តCRV ពណ៌ ទឹកប្រាក់ ផ្លាកលេខភ្នំពេញ 2M-2821 បើកបរដោយឈ្មោះសុទ្ធ រិទ្ធី ភេទប្រុស អាយុ ៣៨ឆ្នាំ មានទីលំនៅភូមិ៤ សង្កាត់លេខ៤ ក្រុង/ខេត្តព្រះសីហនុ អ្នករួមដំណើរចំនួន ២នាក់ ប្រពន្ធនិងកូន (តែមុនពេលកើតហេតុ ប្រពន្ធ និងកូន បានចុះទៅទិញចំណីអាហារ មិនបាននៅក្នុងរថយន្តទេ ) ។
គ្រោះថ្នាក់នេះបណ្ដាលឲ្យស្លាប់មនុស្ស ១នាក់ និង រងរបួសមនុស្សចំនួន១នាក់៖
១-ឈ្មោះ សុទ្ធ រិទ្ធី អ្នកបេីករថយន្ដCRV គាបស្លាប់ នៅក្នុងរថយន្ត ។
២-អ្នកបើកបររថយន្ត HYUNDAI រងរបួសធ្ងន់ បានបញ្ជូនទៅសង្គ្រោះមន្ទីរពេទ្យបង្អែកស្រុកស្រែអំបិល ។
រថយន្តទាំងពីរ ខូចខាតធ្ងន់ សមត្ថកិច្ចជំនាញកំពុងចាត់ចែងស្ទូច យកទៅរក្សាទុកនៅអធិការដ្ឋាននគរបាលស្រុកកំពង់សិលា ។
