បែកធ្លាយសារឆ្លើយឆ្លង រវាងជនរងគ្រោះ និងជនសង្ស័យនៅក្នុងឈែតផងដែរ មុនពេលកើតហេតុ(មានវីដេអូ)
ស្នងការដ្ឋាននគរបាលខេត្តបាត់ដំបង នៅថ្ងៃទី ០៨ ខែធ្នូ ឆ្នាំ ២០២២ នេះ បានបំភ្លឺព័ត៌មានជុំវិញករណីផ្ទុះអាវុធ នៅក្នុងក្រុងបាត់ដំបង ឱ្យបានដឹងថា កាលពីវេលាម៉ោង ៤ និង ០០ នាទីទៀបភ្លឺ នៃយប់ថ្ងៃទី ៧ ខែធ្នូ ឆ្នាំ ២០២២ នៅចំណុចសួនច្បារមាត់ស្ទឹងសង្កែត្រើយខាងលិចទល់មុខធនាគារFTB ស្ថិតនៅភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង មានករណីបាញ់បោះដោយអាវុធមួយបានកើតឡើង ដែលករណីនេះបង្កដោយជនសង័្សយជិះរថយន្តមួយគ្រឿងបានប្រើប្រាស់ អាវុធខ្លីបាញ់ជាច្រើនគ្រាប់សំដៅទៅលើក្រុមយុវជនមួយក្រុមដែលកំពុងអង្គុយនៅចំណុចនោះ ដែលក្នុងនោះមានជនរងគ្រោះចំនួន ០៣ នាក់ភេទប្រុស រងរបួសស្រាលចំនួន ០២ នាក់ និងបាត់បង់ជីវិតម្នាក់។
ចំពោះករណីនេះ ខាងសមត្ថកិច្ចបានបន្តឱ្យដឹងថា មុខសញ្ញាជាជនសង័្សយត្រូវសមត្ថកិច្ចបង្រ្កាបឃាត់ខ្លួនបក្សពួកជាជនសង្ស័យបានចំនួន ០១ នាក់ហើយ ដែលខណ:នេះកំពុងនាំខ្លួនមកកាន់ស្នងការដ្ឋាននគរបាលខេត្តបាត់ដំបង ដើម្បីធ្វើការស្រាវជ្រាវបន្ត រីឯបក្សពួកផ្សេងទៀតកំពុងស្វែងតាមចាប់ខ្លួនជាបន្តទៀត។
ទន្ទឹមនឹងនេះ គេក៏សង្កេតឃើញមានការបែកធ្លាយសារឆ្លើយឆ្លង រវាងជនរងគ្រោះ និងជនសង្ស័យនៅក្នុងឈែតផងដែរ មុនពេលកើតហេតុខាងលើ ដែលសារទាំងនោះមានដូចក្នុងវីដេអូខាងក្រោម ៖
