រំភើបណាស់! ចុះពីឆាកភ្លាម វណ្ណដា ទម្លាយអារម្មណ៍ពេលបានសម្ដែងបទ «Time To Rise» ជាមួយលោកតា គង់ ណៃ

ព្រឹត្តិការណ៍ធំ និង កក្រើកនៃពិធីបិទកីឡាជាតិ លើកទី ៣ និង កីឡាជាតិជនពិការ លើកទី ១ ឆ្នាំ ២០២២ នៅរាត្រីថ្ងៃទី ៣០ ខែវិច្ឆិកា ឆ្នាំ ២០២២ យប់មិញ បានអង្រួនពហុកីឡដ្ឋានជាតិមរតកតេជោឱ្យពោរពេញដោយសំឡេងហ៊ោកញ្ជ្រៀវអបអរសាទរជាមួយនឹងវត្តមានកំពូលតារាចម្រៀងល្បីៗលំដាប់ប្រទេស បង្ហាញវត្តមានច្រៀង និង សម្ដែងនៅចំពោះមុខថ្នាក់ដឹកនាំធំៗ ក៏ដូចជាទស្សនិកជន។

ងាកមកតារាចម្រៀងរ៉េបកំពុងពេញនិយម វណ្ណដា ក្រោយច្រៀង និង សម្ដែងដោយជោគជ័យនៅក្នុងរាត្រីនោះ លោកបានបង្ហោះសារយ៉ាងរំភើបស្ដែងពីអារម្មណ៍ពិតថា ៖ «ជាដំបូងខ្ញុំបាទពិតជាមានកិត្ដិយសដែលបានចូលរួមសម្ដែងក្នុង «ពិធីបិទកីឡាជាតិ លើកទី ៣ និង កីឡាជាតិជនពិការ លើកទី ១ ឆ្នាំ២០២២» ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា»។

វណ្ណដា បន្តថា ៖ «នេះគឺជាលើកទី ១ របស់ខ្ញុំដែលបានធ្វើការសម្ដែងបទចម្រៀង «Time To Rise» ជាមួយលោកតាព្រឹទ្ធាចារ្យ គង់ ណៃ ព្រមទាំងលោកយាយ ដោយផ្ទាល់ជូនថ្នាក់ដឹកនាំគ្រប់ជាន់ថ្នាក់ ពុកម៉ែបងប្អូន និង ហ្វេនៗយ៉ាងច្រើននៅក្នុងពហុកីឡដ្ឋានជាតិមរតកតេជោ។ ខ្ញុំពិតជាមិនអាចរកពាក្យអ្វីមកប្រៀបផ្ទឹមបានជាមួយនឹងអារម្មណ៍នៅពេលនេះ ក្រៅពីមានមោទកភាព និង ទទួលបានភាពកក់ក្តៅពីសំឡេងអបអរសាទររួមបញ្ចូលជាមួយក្តីស្រឡាញ់»៕