ជនសង្ស័យម្នាក់ ត្រូវកម្លាំងជំនាញនៃអធិការដ្ឋាននគរបាលស្រុកសង្កែ ឃាត់ខ្លួន ករណីលួចម៉ូតូ

ខេត្តបាត់ដំបង ៖ ឃាត់ខ្លួនជនសង្ស័យនេះ ធ្វើឡើងនៅចំណុចក្រុមទី២០ ភូមិអូរស្រឡៅ ឃុំវត្តតាមិម ស្រុកសង្កែ ខេត្តបាត់ដំបង ក្រោមបទបញ្ជារបស់លោកវរសេនីយ៍ទោ យុត តុងហូ អធិការនគរបាលស្រុកសង្កែ ក្រោយទទួលបានបណ្តឹងពីជនរងគ្រោះឈ្មោះ សៃ ស្រីពៅ ភេទស្រី អាយុ៣២ឆ្នាំ មានទីលំនៅក្រុម០១ ភូមិកំពង់ពិល ឃុំវត្តតាមិម ស្រុកសង្កែ ខេត្តបាត់ដំបង ថាមានករណីជនមិនស្គាល់មុខបានធ្វើសកម្មភាពលួចយកម៉ូតូចំនួន០១គ្រឿង ម៉ាកហុងដាឌ្រីម ស៊េរីឆ្នាំ២០២២ ពណ៌ខ្មៅ លេខតួ/លេខម៉ាស៊ីន ND១២៥ ME-៦៣៨៣៩១៣ គ្មានផ្លាកលេខ ជិះយកទៅបាត់។

ក្រោយពេលទទួលបណ្តឹងរួចរាល់ កំលាំងនៃអធិការដ្ឋាននគរបាលស្រុកសង្កែ បានសហការជាមួយកំលាំងនៃអធិការដ្ឋាននគរបាលក្រុងបាត់ដំបង បានធ្វើការស្រាវជ្រាវស៊ើបអង្កេតរហូតឃាត់ខ្លួនបានជនសង្ស័យឈ្មោះ ជា សុវណ្ណា ភេទប្រុស អាយុ៤១ឆ្នាំ មានទីលំនៅភូមិស្លក្រាម ឃុំវត្តតាមិម ស្រុកសង្កែ ខេត្តបាត់ដំបង និងបានដកហូតវត្ថុតាងម៉ូតូចំនួន០១គ្រឿងផងដែរ។
ក្រោយពីឃាត់ខ្លួនយកមកសាកសួរជនសង្ស័យឈ្មោះ ជា សុវណ្ណា បានឆ្លើយសារភាពថា ខ្លួនពិតជាបានលួចយកម៉ូតូខាងលើពិតប្រាកដមែន បន្ទាប់មកក៏បានកសាងសំណុំរឿងបញ្ជូនទៅការិយាល័យជំនាញដើម្បីចាត់ការតាមនីតិវិធីច្បាប់ ៕