ពិធីការិនីស្រស់ស្អាត ៥ រូប ប្រែវាសនាប្តូរងារជាជំទាវ

ប្រិយមិត្តនិយមតាមដានជីវិតឯកជនរបស់សិល្បករ-ការិនី ក្នុងរង្វង់សិល្បៈ ច្បាស់ណាស់ប្រកដជាចង់ដឹងនូវរឿងរ៉ាវឯកជនរបស់ពួកគេជាក់ជាមិនខាន។ ពិសេសនោះ គឺសិល្បករ-ការិនី ដែលធ្លាប់មានឈ្មោះល្បីល្បាញក្នុងរង្វង់សិល្បៈ តែត្រូវបានបញ្ចប់អាជីពនេះ ហើយទៅសាងជីវិតឯកជនយ៉ាងមានសុភមង្គល ដោយខ្លះបានរៀបការហើយខ្លះទៀត ក្រោយរៀបការក៏បានបន្តអាជីពសិល្បៈដូចដើម។

ថ្ងៃនេះ នឹងលើកយកនូវរឿងរ៉ាវរបស់អតីតតារាស្រីចំនួន ៥ រូប ដែលមានអាជីពជាពិធិការិនីកាលនៅក្នុងវិថីសិល្បៈ តែក្រោយរៀបការនឹងស្វាមីជាអ្នកមានមុខមាត់ក្នុងសង្គមហើយនោះ ម្នាក់ៗកំពុងសំងំរស់នៅយ៉ាងមានសុភមង្គល លើគំនរទ្រព្យសម្បត្តិយ៉ាងស្តុកស្តម្ភក្នុងនាមជាជំទាវ។

១. លោកជំទាវ ស្រីតូច ចំណាន
លោកជំទាវ ម៉ៅ ចំណាន ដែលមានឈ្មោះហៅក្រៅ ស្រីតូច ចំណាន គឺជាអតីតអ្នកក្នុងសិល្បៈមួយរូបមានឈ្មោះបោះសំឡេង ដោយកាលនោះមិនត្រឹមតែជាតារាសម្តែងតែម្យ៉ាងទេ លោកជំទាវ ក៏ជាអតីតពិធីការិនីប្រចាំទូរទស្សន៍ប៉ុស្តិ៍លេខ ៥ ផងដែរ។ ពេលនេះ អតីតពិធីការិនីល្បីឈ្មោះរូបនេះ បានក្លាយជាជំទាវ បន្ទាប់ពីរៀបការជាមួយអ្នកឧកញ៉ា គិត ម៉េង ដែលគេស្គាល់ថាជាសេដ្ឋីស្រុកខ្មែរ និង ជាប្រធានក្រុមហ៊ុន Royal Group។ យ៉ាងណាមិញ មកដល់ពេលនេះដែរ លោកជំទាវ ទទួលបានចំណងអាពាហ៍ពិពាហ៍កូន ៤ នាក់។

២. លោកជំទាវ ពេជ្រ ច័ន្ទបូរមី

ងាកមកមើលអតីតតារាសម្តែងដ៏ស្រស់សោភា ពេជ្រ ច័ន្ទបរមី បច្ចុប្បន្នបានទទួលងារជាជំទាវ ក្រោយក្លាយជាភរិយារបស់ឧត្តមសេនីយ៍ កែវ វ៉ាន់ថន ជាអ្នកនាំពាក្យអគ្គនាយកដ្ឋាននគរបាលអន្តោប្រវេសន៍ ក្រសួងមហាផ្ទៃ និង ទទួលបានចំណងដៃកូន ២ នាក់ផងដែរ។ ជំទាវ ពេជ្រ ច័ន្ទបរមី ក៏ជាអតីតពិធីការិនីល្បីឈ្មោះដែរ ដោយកម្មវិធីលោកជំទាវទទួលបានប្រជាប្រិយភាពខ្លាំងគឺកម្មវិធី «កំណប់អារម្មណ៍» របស់ឯកឧត្តម ហ្វៃ សំអាង។

៣. លោកជំទាវ លី ឈី

អតីតតារាស្រី លី ឈី ត្រូវបានបញ្ចប់លើអាជីពជាពិធីការិនីប្រចាំទូរទស្សន៍ Town ក្រោយចាប់ដៃរៀបការនឹងអតីតអ្នកដឹកនាំល្បីឈ្មោះ និង ជាអ្នកគ្រប់គ្រងផលិតកម្ម Town ប៊ុន រតនា នៅអំឡុងឆ្នាំ ២០១៩។ មិនយូរប៉ុន្មាន ស្វាមីរបស់អតីតារាស្រីខាងលើក៏បានទទួលបានគោរមងារជាឧកញ៉ា ហើយ លី ឈី ក៏បានឡើងងារជាជំទាវទាំងវ័យក្មេង ពោលគឺអាយុមិនទាន់ដល់ ៣០ ឆ្នាំ នៅឡើយ។ បច្ចុប្បន្ន លោកជំទាវ លី ឈី និង លោកឧកញ៉ា ប៊ុន រតនា ទទួលបានចំណងដៃកូនស្រី ១ នាក់ និង ប្រុស ១ នាក់។

៤. លោកជំទាវ វ៉ាន់ ម៉ូនិច

អតីតពីធីការិនីប្រចាំ My TV វ៉ាន់ ម៉ូនិច ក៏ដូចគ្នានឹងអតីតតារាស្រី លី ឈី ដែរ ដោយអតីតពិធីការិនីរូបនេះ បានក្លាយទៅជាជំទាវទាំងវ័យក្មេង ក្រោយពីបានរៀបការនឹងលោកឧកញ៉ាស្រស់សង្ហាជាស្វាមី។ បច្ចុប្បន្ន លោកជំទាវ វ៉ាន់ ម៉ូនិច ក៏កំពុងតែរស់នៅលើគំនរសុភមង្គល និង ទ្រព្យស្តុកស្តម្ភ ព្រមទាំងទទួលបានចំណងដៃអាពាហ៍ពិពាហ៍កូនប្រុសចំនួន ២ នាក់ផងដែរ។

៥. លោកជំទាវ ស៊ីម សូលីកា

ពិធិការិនីប្រចាំស្ថានីយទូរទស្សន៍ប៉ុស្តិ៍បាយ័ន ស៊ីម សូលីកា ក្រោយស្វាមីពិធីករ អេង ឬទ្ធី ទទួលបានគោរមងារជាឯកឧត្តម ពិធីការិនីមានប្រជាប្រិយភាពខាងលើ ក៏ប្តូរងារជាជំទាវផងដែរ។ បច្ចុប្បន្ន ជំទាវ ស៊ីម សូលីកា ក៏នៅតែបន្តអាជីពជាពិធីការិនីដូចដើម៕