សម្លេងវាយគង ទូងស្គ បានបន្លឺឡើងនៅគ្រប់ទីកន្លែងក្នុងប្រទេសកម្ពុជា រួមទាំងសាលាខណ្ឌមានជ័យ ក៏បានចូលរួមអបអរសាទរ ក្នុងការដាក់ ល្ខោនខោល ជាសម្បត្តិបេតិកភណ្ឌអរូបី នៃមនុស្សជាតិ!
រាជធានីភ្នំពេញ ៖ មោទនភាពជាតិខ្មែរ វប្បធម៌អរូបីរបស់ខ្មែរ ត្រូវបានដាក់បញ្ចូលជាសម្បត្តិបេតិកភណ្ឌអរូបីសម្រាប់មនុស្សជាតិទូទៅ សូមអបអរសាទរ “ល្ខោនខោល” ត្រូវបានដាក់បញ្ចូលជាសម្បត្តិបេតិកភណ្ឌអរូបីសម្រាប់មនុស្សជាតិទូទាំងពិភពលោក។ ជយោ ព្រះរាជាណាចក្រកម្ពុជា! ល្ខោនខោល ចូលជាសម្បត្តិបេតិកភណ្ឌអរូបី នៃមនុស្សជាតិរបស់អង្គការយូណេស្កូពិភពលោក។
ស្នូរសម្លេងវាយគង ទូងស្គ ទះប៉ោត និងគោះត្រដោក បានបន្លឺឡើងនៅគ្រប់ទីកន្លែង ក្នុងប្រទេសកម្ពុជា នាវេលាម៉ោង១០យប់ ថ្ងៃទី៣០ ខែវិច្ឆិកា ឆ្នាំ២០១៨នេះ ដើម្បីអបអរសាទរព្រឹត្តិការណ៍ ជាប្រវត្តិសាស្ត្រនៃការដាក់បញ្ចូល ល្ខោនខោល ចូលក្នុងបញ្ជីបេតិកភ័ណ្ឌ អរូបីយនៃមនុស្សជាតិ របស់អង្គការយូណេស្កូ។ ជាមួយព្រឹត្តិការណ៍ដ៏អស្ចារ្យនេះ សាលាខណ្ឌមានជ័យ បានប្រារព្ធពិធីអបអរសាទរ ដោយមានការចូលរួមពីលោក ឡុង ង៉ែត អភិបាលរងខណ្ឌមានជ័យ តំណាងដ៏ខ្ពង់ខ្ពស់របស់លោក ពេជ្រ កែវមុនី អភិបាលខណ្ឌមានជ័យ និងមានការចូលរួមពីមន្ត្រីរាជការចំណុះឲ្យរដ្ឋបាលខណ្ឌមានជ័យ និងកម្លាំងអាវុធហត្ថខណ្ឌ កម្លាំងនគរបាលខណ្ឌ កម្លាំងប្រជាការពារខណ្ឌ និងមន្ត្រីរាជការទាំង៧សង្កាត់នៃខណ្ឌមានជ័យ យ៉ាងច្រើនកុះករ នៅបរិវេណសាលាខណ្ឌមានជ័យ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ល្ខោនខោល ដែលជាស្នាដៃសិល្បៈបុរាណដ៏វិសេសវិសាលអស្ចារ្យរបស់កម្ពុជា ត្រូវបានអង្គការយូណេស្កូសម្រេចដាក់ចូលក្នុងបញ្ជី បេតិកភ័ណ្ឌពិភពអរូបីយនៃមនុស្សជាតិ ក្នុងឱកាសកិច្ចប្រជុំលើកទី១៣ ក្នុងទីក្រុងព័រល្វីស នៃសាធារណរដ្ឋម៉ូរីស នៅថ្ងៃទី២៨ ខែវិច្ឆិកា ឆ្នាំ២០១៨នេះ។
សម្តេចនាយករដ្ឋមន្ត្រី បានចាត់ទុកសមិទ្ធផលនេះ គឺជាមោទនភាពថ្មីមួយទៀត សម្រាប់ប្រជាពលរដ្ឋ និងប្រទេសកម្ពុជា។ សម្តេចតេជោប្រមុខរាជរដ្ឋាភិបាល បានលើកឡើងថា សមិទ្ធផលនេះ គឺជាលទ្ធផលនៃកិច្ចប្រឹងប្រែងដ៏យូរអង្វែង និងការពុះពារយ៉ាងសកម្មរបស់រាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា និងការគាំទ្រយ៉ាងផុលផុសពីសិល្បៈករ អង្គការ សមាគមន៍ សង្គមស៊ីវិល ដែលធ្វើការក្នុងវិស័យសិល្បៈវប្បធម៌ និងការគាំទ្រលើកទឹកចិត្តពីមហាជនទូទៅ និងប្រជាជនកម្ពុជាទាំងមូល។
សម្តេចនាយករដ្ឋមន្ត្រី បានបន្ថែមថា ការដាក់បញ្ចូល ល្ខោនខោល ទៅក្នុងបញ្ជីអរូបីយនៃមនុស្សជាតិនាពេលនេះ គឺជាការរួមចំណែកធ្វើឲ្យកេរ្តិ៍ឈ្មោះរបស់ព្រះរាជាណាចក្រកម្ពុជា កាន់តែល្បីសុះសាយទូទាំងពិភពលោក ហើយធ្វើឲ្យកម្ពុជាក្លាយជាតួអង្គកាន់តែលេចធ្លោរថែមទៀត នៅលើវេទិកាបេតិកភ័ណ្ឌពិភពលោក៕ (សារព័ត៌មានហង្សតូច)
