បុរសម្នាក់ សង្ស័យស្រវឹងស្រា បើករថយន្តស៊េរីទំនើប មួយគ្រឿង ជ្រុលចង្កូតទៅបុករះចូលផ្ទះប្រជាពលរដ្ឋ និងដើមឈើមួយដើមបាក់រាបដល់ដី នៅភ្នំពេញ

ភ្នំពេញ: ហេតុការណ៍នេះកើតឡើង កាលពី ថ្ងៃទី២១ ខែកញ្ញាឆ្នាំ២០២២ នៅតាមបណ្តោយផ្លូវលេខ១៨០០ ស្ថិតក្នុងសង្កាត់ទួលសង្កែទី២ ខណ្ឌឬស្សីកែវ រាជធានីភ្នំពេញ។

មុនកើតហេតុគេឃើញបុរសម្នាក់សង្ស័យស្រវឹងស្រាខ្លាំង បានបើករថយន្តមួយគ្រឿងម៉ាកLexus nx -200t ពណ៌ខ្មៅ ពាក់ស្លាកលេខភ្នំពេញ2BB-0567 ធ្វើដំណើរតាមបណ្ដោយផ្លូវលេខ១៩០០ក្នុងទិសដៅពីកើតទៅលិច លុះមកដល់ចំណុចកើតហេតុខាងលើដោយសារផ្លូវកោងបួងចង្កូតមិនទាន់ក៏ជ្រុលទៅបុករះចូលផ្ទះប្រជាពលរដ្ឋបណ្ដាលឲ្យខូតខាតទ្វារផ្ទះ និងសំយាបផ្ទះ និងរថយន្តមួយគ្រឿង ម៉ូតូមួយគ្រឿង ដើមឈឺមួយដើមបាក់រាបដល់ដីនិងបង្គោលប៉ាណូមួយដើមទៀត បណ្ដាលឱ្យទ្រេត ហើយបែកទុយយោទឹក រួមនឹងសម្ភារៈមួយចំនួនទៀត រីឯរថយន្តបង្កខូចខាតយ៉ាងដំណំ។

សមត្ថកិច្ចឃាត់ខ្លួនអ្នកបើកបរទុកប្រគល់ជូនជំនាញបន្តនីតិវិធី។ ចំណែករថយន្តបង្កត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញរង់ចាំធ្វើការដោះស្រាយគ្នាតាមផ្លូវច្បាប់៕