មុខសញ្ញាលួចកាច់កម៉ូតូ ជិះឌុបគ្នា ឆ្វែល ចុះឡេីង ដើររកលួចទ្រព្យសម្បត្តិក្នុងភូមិ ជួបកម្លាំងអន្តរាគមន៍ខណ្ឌមានជ័យ កំពុងល្បាតពេលរាត្រី ឃាត់ឆែកឆេររកឃេីញ (ឧបករណ៍កាច់សោរកម៉ូតូ)ក៏វាយខ្នោះទាំងពីរនាក់ បញ្ជូនទៅប៉ុស្តិ៍តែម្ដង!

រាជធានីភ្នំពេញ ៖ ជនសង្ស័យ២នាក់ជាមុខសញ្ញាលួចកាច់កម៉ូតូយ៉ាងសកម្ម ជិះម៉ូតូកញ្ចាស់ឌុបគ្នា ឆ្វែល ចុះឡេីង បំណងដើររកលួចទ្រព្យសម្បត្តិប្រជាពលរដ្ឋក្នុងភូមិ ចៃដន្យអស់លក្ខណ៍ពេលជួបកម្លាំងផ្នែកអន្តរាគមន៍នៃអធិការដ្នានខណ្ឌមានជ័យ និងកម្លាំងប៉ុស្តិ៍បឹងទំពន់ទី១ កំពុងល្បាតពួនស្ទាក់ទប់ស្កាត់បទល្មេីស ដេីម្បីរក្សាសន្តិសុខ សុវត្ថិភាពជូនបងប្អូនប្រជាពលរដ្ឋនាពេលរាត្រី បានប្រទះឃេីញក៏ឃាត់សុំត្រួតពិនិត្យឆែកឆេរ ជាក់ស្ដែងរកឃើញ(ឧបករណ៍កាច់សោរកម៉ូតូមួយឈុត) ទេីបសមត្ថកិច្ចឃាត់ខ្លួនបញ្ជូនទៅស្នាក់ការប៉ុស្តិ៍ធ្វើការសាកសួរតែម្ដង ។

ការឃាត់ខ្លួននេះធ្វេីឡេីងកាលពីវេលាម៉ោង១២:៣០នាទីយប់រំលងអាធ្រាត្រ ឈានចូលថ្ងៃពុធ ទី១៤ ខែកញ្ញា ឆ្នាំ២០២២នេះ នៅចំណុចផ្លូវលេខ៤៥BT ភូមិសន្សំកុសល២ សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ ។

បេីតាមសម្ដីលោកអនុសេនីយ៍ឯក ភក្ដី ម៉ាណេត នាយផ្នែកអន្តរាគមន៍នៃអធិការដ្ឋានខណ្ឌមានជ័យ បានប្រាប់ក្រុមការងារសារព័ត៌មាន ហង្សតូច ថា មុនពេលឃាត់ខ្លួនជនសង្ស័យខាងលេី គឺដោយមានបទបញ្ជារបស់លោកវរសេនីយ៍ទោ អ៊ុក បូនីន អធិការនគរបាលខណ្ឌមានជ័យ នោះ បានឲ្យកម្លាំងផ្នែកអន្តរាគមន៍នៃអធិការដ្ឋាននគរបាលខណ្ឌមានជ័យ ដែលយប់កេីតហេតុនេះ ដឹកនាំដោយរូបលោកដែលជានាយផ្នែកអន្តរាគមន៍ សហការជាមួយកម្លាំងប៉ុស្តិ៍រដ្ឋបាលទាំង៧ បានចេញល្បាតពួនស្ទាក់ទប់ស្កាត់បទល្មើសនៅក្នុងមូលដ្ឋាន ដេីម្បីរក្សាសន្តិសុខ សុវត្ថិភាពជូនបងប្អូនប្រជាពលរដ្ឋនាពេលរាត្រី ។

នាយផ្នែកអន្តរាគមន៍នៃអធិការដ្ឋានខណ្ឌមានជ័យ បន្តទៀតថា លុះមកដល់ផ្លូវលេខ៤៥BT ស្ថិតភូមិសន្សំកុសល២ សង្កាត់បឹងទំពន់ទី១ ខណ្ឌមានជ័យ ក៏ប្រទះឃើញបុរស(ជនសង្ស័យ)ចំនួន០២នាក់ ឈ្មោះ អៀវ ឆេង និងឈ្មោះ មៃ សេងរិទ្ធ កំពុងជិះម៉ូតូមួយគ្រឿង ម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1F-7217 ឌុបគ្នាតាមផ្លូវ ដោយមានការសង្ស័យ កម្លាំងល្បាតក៏បានហៅធ្វើការត្រួតពិនិត្យឆែកឆេររកឃើញដូចជា : ទុលឡឺវីស, ដែកកាប់, ដែកសសៃលួស, ដែកចុងស្រួច(ឧបករណ៍កាច់សោរកម៉ូតូ) និងពិលពាក់ក្បាល ទេីបធ្វេីការឃាត់ខ្លួនភ្លាមៗ រួចនាំខ្លួនជនសង្ស័យទាំង០២នាក់ខាងលើ យកមកសាកសួរនៅទីស្នាក់ការប៉ុស្តិ៍នគរបាលរដ្ឋបាលបឹងទំពន់ទី១ ។ នៅចំពោះមុខសមត្ថកិច្ច ជនសង្ស័យក៏បានឆ្លើយសារភាពថា ពួកគេពិតជាមានបំណងដើររកលួចទ្រព្យសម្បត្តិរបស់ប្រជាពលរដ្ឋក្នុងសង្កាត់បឹងទំពន់ទី១ ខណ្ឌមានជ័យ ពិតប្រាកដមែន តែចៃដន្យជួបកម្លាំងល្បាតសុំឆែកឆេរត្រួតពិនិត្យឃេីញវត្ថុតាងក៏ឃាត់ខ្លួនតែម្ដង ។

វត្ថុតាងចាប់យក ម៉ូតូចាស់ ០១គ្រឿង ម៉ាកហុងដាសេ១២៥ ពណ៌ខ្មៅ ពាក់ស្លាកលេខភ្នំពេញ 1F-7217, ទុលឡឺវីស ០១ដើម, ដែកកាប់ ០១, ដែកសសៃលួស ០១, ដែកចុងស្រួច ០១ និងពិលពាក់ក្បាល ០១ ។

បច្ចុប្បន្នជនសង្ស័យចំនួន០២នាក់ កំពុងឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងចាត់ការតាមនីតិវិធី ៕ អត្ថបទរូបភាព បងម៉េង