ប្រុសស្រី២នាក់ រងរបួសធ្ងន់ បន្ទាប់ពីជិះម៉ូតូឌុបគ្នាមិនប្រយត័្នត្រង់ចំណុចផ្លូវបែកជាបួនទើបជ្រុលទៅបុករថយន្ត
រាជធានីភ្នំពេញ៖ហេតុការណ៍គ្រោះថ្នាក់ចរាចរណ៍នេះកើតឡើងនៅវេលាម៉ោង៩:៥០នាទីយប់ ថ្ងៃទី២៧ខែវិច្ឆិកាឆ្នាំ២០១៨ ស្ថិតនៅតាមបណ្តោយផ្លូវលេខ២១៤កែងនិងផ្លូវលេខ៥១ សង្កាត់បឹងរាំង ខណ្ឌដូនពេញ រាជធានីភ្នំពេញ។
តាមប្រភពពត៌មានពីកន្លែងកើតហេតុបានអោយដឹងថាមុនពេលកើតហេតុគេឃើញយុវជនម្នាក់រួមដំណើរជាមួយស្រីម្នាក់បើកម៉ូតូម៉ាកMSX ពណ៌ខ្មៅ ពាក់ស្លាកលេខភ្នំពេញ 1GA-3402ទិសដៅពីជើងទៅត្បូងលុះមកដល់ផ្លូវបំបែកជាបួនមិនប្រយត័្នបានជ្រុលទៅបុករថយន្តមួយគ្រឿងម៉ាកToyota REVO ពណ៌ស ពាក់ស្លាកលេខភ្នំពេញ2AJ-0708 ទិសដៅពីលិចទៅកើតពេញទំហឹងបណ្តាលអោយរងរបួសធ្ងន់ស្រាលពីរនាក់ត្រូវបានបញ្ជួនទៅមន្ទីរពេទ្យភ្លាមៗ។
ក្រោយកើតហេតុសមត្ថកិច្ចមូលដ្ឋានចុះមកដល់បានទំនាក់ទំនងទៅសមត្ថកិច្ចជំនាញមកធ្វើការវាស់វែងរួចយកម៉ូតូនិងរថយន្តទៅរក្សាទុកនៅអធិការដ្ឋាន នគរបាល ខណ្ឌដូនពេញរង់ចាំដោះស្រាយគ្នានៅពេលក្រោយ៕
