បុរសជាជនជាតិបរទេសម្នាក់ សង្ស័យស្រវឹងស្រា បើករថយន្តTacoma មួយគ្រឿង ជ្រុលទៅបុកដើមឈើមួយដើម បណ្ដាលឱ្យរថយន្តខូចខាត យ៉ាងដំណំ នៅភ្នំពេញ

ភ្នំពេញ ៖ កាលពី យប់ថ្ងៃ ទី៧ ខែកញ្ញា ឆ្នាំ២០២២ ស្ថិតនៅតាមបណ្ដោយផ្លួវសហព័ន្ធរុស្សុី ត្រង់ចំណុចមុខព្រលានហោះអន្តរជាតិភ្នំពេញ ក្នុងសង្កាត់កាកាបទី១ ខណ្ឌពោធិ៍សែនជ័យ។

មុនពេលកើតហេតុគេឃើញបុរសជនជាតិចិនម្នាក់ សង្ស័យស្រវឹងស្រាខ្លាំងបានបើករថយន្តម៉ាកTACOMA ពណ៌ស ពាក់ស្លាកលេខភ្នំពេញ2BD -2060 ធ្វើដំណើរតាមបណ្ដោយផ្លូវសហព័ន្ធរុស្សុីពីកើតទៅលិចក្នុងល្បឿនលឿន ខណៈបើកមកដល់ចំណុចកើតហេតុខាងលើក៏ស្រាប់តែរេចង្កូតមកខាងស្ដាំដៃជ្រុលទៅបុកដើមឈើមួយដើមពេញទំហឹង បណ្ដាលឱ្យរថយន្តកល់ជាប់ជាមួយដើមឈើទៅមុខលែងរួច តែសំណាងល្អមិនមានអ្នករងរបួស ។

សមត្ថកិច្ចជំនាញចរាចរណ៍នៃស្នងការដ្ឋាននគរបាលរាជធានីភ្នំពេញ មកធ្វើការវាស់វែងយករថយន្តបង្កទៅរក្សាទុករង់ចាំដោះស្រាយបន្តតាមច្បាប់៕