បុរស២នាក់ត្រូវបាន នគរបាល ឃាត់ខ្លួនក្រោយពីធ្វើសកម្មភាពកាច់កម៉ូតូមួយគ្រឿងតែមិនបានសម្រេច នៅភ្នំពេញ

ភ្នំពេញ ៖ កាលពី ថ្ងៃទី១ខែកញ្ញា ឆ្នាំ ២០២២ ស្ថិតនៅក្នុងសង្កាត់ទឹកល្អក់ 1 ខណ្ឌទួលគោក រាជធានីភ្នំពេញ។
ដំបូងឡើយខ្លួនបានទុកម៉ូតូម៉ាកឌ្រីមសង់មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 1JL7875 នៅខាងមុខផ្ទះ។ពេលនោះក៏ស្រាប់តែមានជនសង្ស័យមួយក្រុមមានគ្នាបួននាក់ ដើរមកអង្គុយលើម៉ូតូបម្រុងកាច់ក យកទៅ តែខ្លួនឃើញទាន់ក៏ស្រែកឆោឡោបង្កការភ្ញាក់ផ្អើល។ភ្លាមៗនេះ ក្រុមជនសង្ស័យប្រើប្រាស់ដំបងនិងដុំថ្មគប់មកលើខ្លួន និងប្រជាពលរដ្ឋនៅក្បែរខាង។
ក្រុមជនសង្ស័យបានរត់គេចខ្លួន ចូលក្នុងបរិវេណសាកលវិទ្យាល័យភូមិន្ទភ្នំពេញបាត់ស្រមោល។ ពេលនោះម្ចាស់ម៉ូតូបានជិះម៉ូតូតាមរក ស្រាប់តែឃើញជនសង្ស័យផ្លោះរបងចេញពីសាកលវិទ្យាល័យភូមិន្ទបម្រុងឡើងជិះកង់បីនៅខាងមុខសាលា ទើបឃាត់ខ្លួនបញ្ជូនឲ្យសមត្ថកិច្ចបានចំនួនពីរនាក់។ ឯពីរនាក់រត់គេចខ្លួនបាត់ស្រមោល។ សមត្ថកិច្ចប៉ុស្តិ៍រដ្ឋបាលនគរបាលសង្កាត់ទឹកល្អក់ទីមួយ បានចុះមកដល់ទីតាំងកន្លែងកើតហេតុ នាំជនសង្ស័យយកទៅសួរនាំនៅឯប៉ុស្តិ៍រដ្ឋបាលនគរបាល ដើម្បីចាត់ការតាមនីតិវិធីច្បាប់៕