ល្បីឈ្មោះ តាល់ ចាប់ផ្ដើមបើកល្បែងភ្នាល់ទឹកភ្លៀងយ៉ាងរលូនទៀតហើយ

បាត់ដំបង ៖ ប្រភពស្និទ្ធនឹងមេល្បែងភ្នាល់ទឹកភ្លៀងឈ្មោះ តាល់ បានឲ្យដឹងថា ជារៀងរាល់ឆ្នាំល្បែងភ្នាល់ទឹកភ្លៀងត្រូវបើកលេងចាប់ពីខែឧសភា ដើមរដូវវស្សា ប៉ុន្តែនៅឆ្នាំ2022នេះ ល្បែងភ្នាល់ទឹកភ្លៀងចាប់ផ្ដើមតាំងពីខែមីនាមកម៉្លេះ។ ការដែលឈ្មោះ តាល់ ចាប់ផ្ដើមបើកល្បែងភ្នាល់ទឹកភ្លៀងតាំងពីដើមខែមីនា គឺជាវិធីប្រមូលអតិថិជនឲ្យបានច្រើន ហើយក៏មានអ្នកលេងល្បែងភ្នាល់ទឹកភ្លៀងយ៉ាងគគ្រឹកគគ្រេងដែរ។ មន្រ្តីអាជ្ញាធរ និងសមត្ថកិច្ចក្នុងក្រុងបាត់ដំបង មិនហ៊ានប៉ះពាល់មេល្បែងភ្នាល់ទឹកភ្លៀងឈ្មោះ តាល់នោះទេ ព្រោះដឹងថា មេល្បែងរូបនេះមានខ្នងបង្អែកក្រាស់ ដូច្នេះហើយទើបបុគ្គលឈ្មោះ តាល់ អាចធ្វើអ្វីៗតាមអំពើចិត្ត។

ឈ្មោះ តាល់ ចាប់ផ្ដើមបើកល្បែងភ្នាល់ទឹកភ្លៀងយ៉ាងពេញទំហឹងនៅក្នុងក្រុងបាត់ដំបង ហើយសមត្ថកិច្ច និងមន្រ្តីអាជ្ញាធរមូលដ្ឋានរក្សាភាពស្ងៀមស្ងាត់។ ប្រជាពលរដ្ឋបានអំពាវនាវឲ្យលោក សាត គឹមសាន ស្នងការនគរបាលខេត្តបាត់ដំបង និងលោក សុខ លូ អភិបាលខេត្តបាត់ដំបង គួរពិនិត្យឡើងវិញខ្លះផង ព្រោះល្បែងស៊ីសងធ្វើឲ្យប៉ះពាល់យ៉ាងខ្លាំងដល់សន្តិសុខសង្គម។ ដោយហេតុថាឈ្មោះ តាល់ មានខ្នងបង្អែករឹងមាំ ទើបអាចបើកល្បែងភ្នាល់ទឹកភ្លៀងផ្ដាច់មុខខេត្តបាត់ដំបង ហើយប្រមូលលុយបានយ៉ាងច្រើនសន្ធឹកសន្ធាប់ជារៀងរាល់ថ្ងៃ។

ប្រភពពីប្រជាពលរដ្ឋនៅក្នុងសង្កាត់អូរចារ បានឲ្យដឹងទីតាំងល្បែងភ្នាល់ទឹកភ្លៀងរបស់បុគ្គលឈ្មោះ តាល់ តែងតែចល័តនៅតាមអគារខ្ពស់ៗជាច្រើនកន្លែងក្នុងក្រុងបាត់ដំបង ប៉ុន្តែទីតាំងគោលដៅសំខាន់ គឺនៅខាងក្រោយផ្សារភូពុយ ភូមិអញ្ចាញ សង្កាត់អូរចារ ក្រុងបាត់ដំបង។ ប្រជាពលរដ្ឋបានលើកឡើងថា ល្បែងភ្នាល់ទឹកភ្លៀងមានអ្នកចូលរួមលេងយ៉ាងពពាក់ពពូន ដោយចាក់ភ្នាល់ចាប់ពី100ដុល្លារ ទៅដល់រាប់ពាន់រាប់ម៉ឺនដុល្លារ ហើយមេល្បែងឈ្មោះ តាល់ ប្រមូលលុយយ៉ាងស្រួលៗ។ ហេតុនេះហើយទើបប្រជាពលរដ្ឋអំពាវនាវឲ្យលោក សាត គឹមសាន ស្នងការនគរបាលខេត្តបាត់ដំបង និងលោក សុខ លូ អភិបាលខេត្តបាត់ដំបង ចាត់វិធានការបង្ក្រាបល្បែងស៊ីសងជាបន្ទាន់ដើម្បីពង្រឹងសន្តិសុខសង្គម៕