តូតា បញ្ជាក់យ៉ាងច្បាស់ ជុំវិញព័ត៌មានរៀបការរបស់នាង !
កន្លងមកមានលេចឮព័ត៌មានថា តូតា នឹងរៀបការជាមួយគូស្នេហ៍របស់នាង នៅបំណាច់ឆ្នាំ ២០១៨ នេះ ដោយនាងត្រៀមនឹងអញ្ជើញមិត្តភក្តិជាច្រើនចូលរួមអបអរសាទរ ដោយឡែកពេលជួបជាមួយនាងកាលពីពេលថ្មីៗនេះ នាងបែរជានិយាយថា គ្មានទេមង្គលការនៅចុងឆ្នាំនេះ ។
តូតា និង គូស្នេហ៍របស់នាង កាន់តែផ្អែមល្ហែម និង ស្អិតរមួតនឹងគ្នាកាន់តែខ្លាំងឡើងៗ ទោះបីជាអ្នកទាំងពីរពុំទាន់ដឹកដៃគ្នាចូលរោងការទៅតាមប្រពៃណីខ្មែរក្តី ។ ប៉ុន្តែទំនាក់ទំនងអ្នកទាំងពីរគឺស្អិតរមួត បេះមិនចេញឡើយ ពេលទៅចូលរួមកម្មវិធីម្តងៗនាងតែងតែបណ្តើរគូស្នេហ៍ទៅជាមួយរហូត ទោះបីជាត្រូវអង្គុយរងចាំរាប់ម៉ោង ក៏គូស្នេហ៍របស់នាងមិនដែលត្អូញត្អែរដែរ ។ ជាក់ស្តែងនៅក្នុងថ្ងៃសម្ពោធដាក់បញ្ចាំងរឿង « កូនពស់កេងកង » កាលពីសប្តាហ៍មុន គូស្នេហ៍របស់នាង បានអង្គុយរងចាំ រហូតដល់ចប់កម្មវិធី ។
ទាក់ទងនឹងរឿងដែលថា នាងមានបំណងរៀបការនៅបំណាច់ឆ្នាំ ២០១៨ នេះ តូតា បានបញ្ជាក់ប្រាប់ថា « ខ្ញុំគ្មានគម្រោងរៀបការនៅចុងឆ្នាំដូចគេនិយាយនោះទេ ហើយពេលនេះ ខ្ញុំសុំមិននិយាយរឿងនេះ ពីព្រោះខ្ញុំចង់ទុកពេលធ្វើការងារសិន មុននឹងឈានដល់ថ្ងៃរៀបការ » ។
ទោះបីជាគ្មានគម្រោងរៀបការនៅបំណាច់ឆ្នាំ ២០១៨ នេះក្តី តែ តូតា នៅតែនិយាយថា រឿងរៀបការជារឿងសំខាន់ គ្រាន់តែនាងមិនទាន់គិតដល់ថ្ងៃនោះតែប៉ុណ្ណោះ ៕
