ក្រុមជនសង្ស័យចាប់ជំរិត១២នាក់ បន្លំខ្លួនធ្វើជាគ្រូពេទ្យចុះយកសំណាក ជំរិតទារប្រាក់៣ម៉ឺនដុល្លារ ត្រូវសមត្ថកិច្ចបង្ក្រាប
ភ្នំពេញ៖ ក្រុមបក្ខពួកជនសង្ស័យប្រុសស្រីចំនួន១២នាក់ បន្លំខ្លួនធ្វើជាក្រុមគ្រូពេទ្យចុះយកសំណាក ហើយចាប់ជំរិតទារប្រាក់ចំនួន៣ម៉ឺនដុល្លារ ត្រូវបានកម្លាំងនគរបាលជំនាញឃាត់ខ្លួន។
ករណីចាប់ជំរិតទារប្រាក់នេះ កើតឡើងនាវេលាម៉ោង ០៤និង០០នាទីល្ងាច ថ្ងៃទី២៥ ខែមីនា ឆ្នាំ២០២១នេះ ស្ថិតនៅចំណុចទីតាំងផ្ទះលេខ០៤ និងលេខ ០៦ ផ្លូវលេ១៤៤ ភូមិ៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ ក្នុងសណ្ឋាគារ POSITANO BOUTIQUE HOTEL ហើយកម្លាំងជំនាញបានរំដោះបុរសជនរងគ្រោះបានចំនួន០២នាក់ដោយសុវត្ថិភាព ។
ក្នុងប្រតិបត្តិការចុះបង្ក្រាបនេះ ដឹកនាំបញ្ជាផ្ទាល់ដោយលោក ឧត្តមសេនីយ៍ទោ ជាវ វិបុល អនុប្រធាននាយកដ្ឋានព្រហ្មទណ្ឌកម្រិតធ្ងន់នៃក្រសួងមហាផ្ទៃ និងដោយមានការសម្របសម្រួលដោយលោក ម៉ុត ដារ៉ា ជាព្រះរាជអាជ្ញារង អមសាលាដំបូងរាជធានីភ្នំពេញ។ ព្រមទាំងមានការចូលរួមសហការជាមួយកម្លាំងសមត្ថកិច្ចខណ្ឌដូនពេញ រហូតឈានទៅធ្វើការឃាត់ខ្លួនក្រុមបក្ខពួកជនសង្ស័យបាន។
ប្រភពព័ត៌មានពីមន្ត្រីជំនាញបានឲ្យដឹងថា÷ នៅមុនពេលកើតហេតុ ក្រុមបក្ខពួកជនសង្ស័យបានស្លៀកពាក់ឯកសណ្ឋានឈុតដូចក្រុមគ្រូពេទ្យចុះយកសំណាក ដើម្បីធ្វើសកម្មភាព ចាប់ជនរងគ្រោះនៅមូលដ្ឋានខណ្ឌចំការមន រួចជំរិតទារប្រាក់ចំនួន៣ម៉ឺនដុល្លារ។ បន្ថែមទៀតនោះ បន្ទាប់ពីក្រុមជនសង្ស័យធ្វើសកម្មភាពរួច ទើបកម្លាំងសមត្ថកិច្ចជំនាញ ទទួលបានព័ត៌មានក៏សហការជាមួយមូលដ្ឋាន ធ្វើការស្រាវជ្រាវ ស៊ើបអង្កេត រហូតជួយរំដោះជនរងគ្រោះចំនួន០២នាក់ ដែលជាជនជាតិចិន រួចកម្លាំងនគរបាលបានឈានដល់ការឃាត់ខ្លួនជនសង្ស័យជាជនជាតិចិននិងវៀតណាមបន្តបន្ទាប់ចំនួន១២នាក់ ក្នុងនោះស្រីម្នាក់ជនជាតិចិន នៅចំណុចសណ្ឋាគារ POSITANO BOUTIQUE HOTEL ដែលមានទីតាំងផ្ទះលេខ០៤ និងលេខ ០៦ ផ្លូវលេ១៤៤ ភូមិ៦ សង្កាត់ផ្សារកណ្តាលទី១ ខណ្ឌដូនពេញ។
បច្ចុប្បន្នជនសង្ស័យប្រុសស្រីទាំង១២នាក់ ត្រូវបានកម្លាំងនគរបាលព្រហ្មទណ្ឌក្រសួងមហាផ្ទៃ ធ្វើការសាកសួរបឋម រួចប្រគល់ជូនកម្លាំងនគរបាលជំនាញមូលដ្ឋានខណ្ឌចំការមនធ្វើការបន្ត ដើម្បីចាត់ការតាមនីតិវិធី៕
