រថយន្តក្រឡុកសុីម៉ង់ត៍ បុកសិស្សសាលាអង្គការ ផ្លាស់ប្តូរ ស្លាប់ម្នាក់នៅកន្លែងកើតហេតុ ចំណែកម្នាក់ទៀតស្លាប់ពេលបញ្ជូនទៅសង្គ្រោះនៅមន្ទីរពេទ្យ

(ភ្នំពេញ)៖ យុវជន៣នាក់ជិៈម៉ូតូឌុបគ្នា ត្រូវបានរថយន្តក្រឡុកសុីម៉ង់ត៍បុកពីក្រោយ បណ្តាលអោយបាត់បង់ជីវិតយុវជនម្នាក់នៅកន្លែងកើតហេតុ ចំណែកម្នាក់ទៀតបាត់បង់ជីវិតពេលបញ្ជូនទៅមន្ទីរពេទ្យ ខណៈដែលអ្នកទី៣កំពុងធ្វើការសង្គ្រោះ រីឯអ្នកបើករថយន្តបើកទ្វារចុះរត់គេចខ្លួនបាត់ ។

ហេតុការណ៍ខាងលើបង្កឡើងកាលពីវេលាម៉ោងប្រមាណជា០១រំលងអធ្រាត្រ ឈានចូលថ្ងៃទី១០ ខែឧសភា ឆ្នាំ២០២០ ត្រង់ចំណុចផ្លូវបំបែក តាមបណ្ដោយផ្លូវដួងងៀប កែងនិងផ្លូវប្រឡាយ ក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។

​បើតាមប្រភពដែលទទួលបាន បានអោយដឹងថាជនរងគ្រោះដែលស្លាប់នៅកន្លែងកើតហេតុមានឈ្មោះ អ៊ិន សឿន ភេទប្រុស អាយុ១៩ឆ្នាំ ជនជាតិខ្មែរ ជាសិស្សរៀននៅសាលាអង្គការ ផ្លាស់ប្តូរ ផ្នែកខាងភ្លេង នៅក្នុងភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ មានស្រុកកំណើតនៅភូមិពោធិ៏ ឃុំស្វាយពោធិ៍ ស្រុកស្រីសន្ធរ ខេត្តកំពង់ចាម ។ ចំណែកជនរងគ្រោះ២នាក់ទៀត មិនទាន់ស្គាល់អត្តសញ្ញាណនៅឡើយ ។

ម៉ូតូជនរងគ្រោះជិះម៉ាក ឌ្រីមសង់ សេ១២៥ ផលិតឆ្នាំ២០១៩ ពណ៌ខ្មៅ ពាក់ស្លាកលេខ ភ្នំពេញ 1HR-8272 ។
ចំណែករថយន្តក្រឡុកសុីម៉ង់ត៍ ពាក់ស្លាកលេខ ភ្នំពេញ 5A-1737 ៕