នគរបាលចាប់ខ្លួនជនសង្ស័យម្នាក់ករណីលួចនៅក្រុងតាខ្មៅ

កណ្ដាលៈ នគរបាលក្រុងតាខ្មៅ ចាប់ខ្លួនជនសង្ស័យម្នាក់ក្នុងករណីលួច បន្ទាប់ពីជនសង្ស័យរូបនេះ បានធ្វើសកម្មភាពលួចទុរយោបូបខ្សាច់នៅក្នុងការដ្ឋានមួយកន្លែង កាលពីវេលាម៉ោង៩និង១០នាទី ថ្ងៃទី១១ ខែមិនា ឆ្នាំ២០២០ ស្ថិតក្នុងភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្តាល។
មន្រ្ដីនគរបាលក្រុងតាខ្មៅបានឲ្យដឹងថា ជនសង្ស័យឈ្មោះ ពៅ លីថូ ភេទប្រុស អាយុ២៧ឆ្នាំ មានទីលំនៅភូមិទួលក្រសាំង សង្កាត់រការខ្ពស់ ក្រុងតាខ្មៅ ខេត្តកណ្តាល ។ ចំណែកជនរងគ្រោះឈ្មោះ ថេង សារិន ភេទប្រុស អាយុ៤១ឆ្នាំ មានទីលំនៅភូមិកោះគរ សង្កាត់រការខ្ពស់ ក្រុងតាខ្មៅ ខេត្តកណ្តាល ។
ប្រភពដដែលបន្ដថា នៅមុនពេលកើតហេតុ ជនរងគ្រោះបានតទុរយោបូមខ្សាច់បំពេញផ្ទៃដី រួចទុកចោលជាយូរថ្ងៃមកហើយ ហើយមានកន្លែងខ្លះបានរបូតដាច់ចេញពីគ្នាផងដែរ ។ លុះដល់វេលាកើតហេតុខាងលើ ស្រាប់តែជនសង្ស័យបានអូសរទេះទៅធ្វើសកម្មភាពលួច ទុយោ១ដើមដែលរបូតនោះ អូសបម្រុងដាក់លើរទេះទៅហើយ ភ្លាមនោះកម្មករដេប៉ូបូមខ្សាច់ឃើញទាន់ ក៏បានចាប់ឃាត់ខ្លួន រួចប្រគល់ជូនសមត្ថកិច្ចប៉ុស្តិ៍រការខ្ពស់ ដើម្បីធ្វើសាកសួរ រួចបញ្ជូនបន្តមកកាន់អធិការដ្ឋាននគរបាលក្រុងតាខ្មៅ ចាត់ការតាមច្បាប់ ៕