ឯកឧត្តម យន្ត មីន៖ សមត្ថកិច្ចតាមមូលដ្ឋាន មានសិទ្ធិចាប់រថយន្តដឹកដី ដែលបំផ្លាញបរិស្ថានតាមផ្លូវសាធារណៈ
ខេត្តព្រះសីហនុ៖ អភិបាលខេត្តព្រះសីហនុ ឯកឧត្តម យន្ត មីន បានចេញបញ្ជាឲ្យរដ្ឋបាលសង្កាត់ និងមន្ត្រីនគរបាលប៉ុសិ៍្តរដ្ឋបាលសង្កាត់ទាំងអស់នៅក្នុងក្រុងព្រះសីហនុ មានសិទ្ធិចាប់ឃាត់រថយន្តដឹកដី ដែលមិនគ្របឲ្យបានត្រឹមត្រូវ ឬធ្វើឲ្យដីជ្រុះប្រឡាក់ផ្លូវក្នុងក្រុង នៅតាមភូមិសាស្ត្រសង្កាត់នីមួយៗ។
ឯកឧត្តមអភិបាលខេត្តឲ្យដឹងដូច្នេះ រួចបញ្ជាក់ថា ក្រោយពេលឃាត់ចាប់រថយន្តដឹកដី ដែលមានបញ្ហាទាំងនោះរួច គឺ សមត្ថកិច្ចនៅតាមមូលដ្ឋាននីមួយៗ ត្រូវរាយការណ៍ជាបន្ទាន់ ទៅកាន់មន្ទីរស្ថាប័នជំនាញរួមមាន៖ រដ្ឋបាលក្រុង និងមន្ទីរបរិស្ថានជាដើម ដើម្បីស្នើឲ្យជួយមានវិធានការផ្លូវច្បាប់ ចំពោះអ្នកបើកបររថយន្ តឬម្ចាស់ក្រុមហ៊ុនដឹកដីទាំងនោះ ដោយត្រូវផាកពិន័យតាមគោលការណ៍ច្បាប់ និងតម្រូវឲ្យភាគីរថយន្តដឹកដីនោះចុះកិច្ចសន្យាលាងសំអាតសំអាតផ្លូវ ដែលមានដីជ្រុះឲ្យបានស្អាតដូចដើម មុននឹងត្រូវដោះលែងវិញ។
ឯកឧត្តម យន្ត មីន អភិបាលខេត្តព្រះសីហនុ បានប្រកាសបែបនេះ គឺធ្វើឡើងនៅ ចំពោះមុខមន្ត្រីរាជការក្រោមឱវាទ នៃរដ្ឋបាលខេត្ត ក្នុងកិច្ចប្រជុំប្រចាំខែ នៅសាលប្រជុំសាលាខេត្តព្រះសីហនុ កាលពីរសៀលថ្ងៃទី៣១ ខែតុលា ឆ្នាំ២០១៨៕
