ពលរដ្ឋស្នើរលោកចៅហ្វាយខណ្ឌ៧ មករា បង្ក្រាបល្បែងស៊ីសង ក្នុងហាងផឹកស៊ី 2NIGHT បើកជាយូរឆ្នាំឡើងដុះស្លែមកហើយ

ភ្នំពេញ៖ ពលរដ្ឋប្រាប់ឲ្យថាហាងផឹកស៊ីមួយកន្លែងមានឈ្មោះថា 2Night ស្ថិតនៅផ្ទះលេខ12A ផ្លូវលេខ១៣៨ សង្កាត់វាលវង់ ខណ្ឌ៧មករា កំពុងបើកលេងល្បែងស៊ីសងស្ទើរគ្រប់ប្រភេទបាន យ៉ាងរលូន ដោយពុំទាន់មានអាជ្ញាធរណាមកបង្ក្រាបនោះទេ ។

ពលរដ្ឋរស់នៅក្បែរៗនោះបានផ្ញើរូប ភាពមក អង្គភាពយើង ដោយបង្ហាញថា ទីតាំងនេះបើកលេងជារៀងរាល់ថ្ងៃ បង្កភាពអសន្តិសុខយ៉ាងខ្លាំង ដែលកន្លងមក ពួកគាត់មិនឃើញមានសមត្ថកិច្ចមូលដ្ឋាន ឬ សមត្ថកិច្ចពាក់ព័ន្ធ ចុះមកត្រួតពិនិត្យ ក៏ដូចជាការបង្ក្រាបឡើយ ។

ពលរដ្ឋបានសំណូមពរដល់អាជ្ញាធរសង្កាត់វាលវង់ ខណ្ឌ៧មករា ជាពិសេសលោក លីម សុភា អភិបាលខណ្ឌ៧មករា សូមមេត្តាចុះពិនិត្យ និង មានវិធានការចំពោះហាងផឹកស៊ីយីហោ 2Night នេះផង ព្រោះបានបើកលេងល្បែងស៊ីសងបានយ៉ាងរលូន ។

កន្លងមក សម្តេចក្រឡាហោម ស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃ បាន បញ្ជាឲ្យសមត្ថកិច្ចគ្រប់រាជធានីនិងខេត្ត ត្រូវលុបបំបាត់រាល់ល្បែងស៊ីសងទាំងអស់ក្នុងមូលដ្ឋានដើម្បីទប់ស្កាត់បទល្មើសលួច ឆក់ ប្លន់ អនុវត្តគោលនយោបាយភូមិ-ឃុំ-សង្កាត់ មាន សុវត្ថិភាព ។

ដោយឡែក លោក ឃួង ស្រេង អភិបាលរាជធានីភ្នំពេញ ក៏ធ្លាប់បានដាក់ចេញវិធានការក្ដៅលើការបង្ក្រាបបទល្មើសនានា និង បង្ក្រាបល្បែងស៊ីសង់គ្រប់ប្រភេទទាំងអស់នៅក្នុងរាជធានីភ្នំពេញ ដើម្បីឱ្យប្រជាពលរដ្ឋរស់នៅដោយភាពកក់ក្តៅ ៕