រថយន្តក្រឡុកស៊ីម៉ងត៍ក្រឡាប់ចូលផ្ទះពលរដ្ឋបង្កឲ្យឆាបឆេះ និងសង្កត់ក្មេងស្រីម្នាក់ស្លាប់
ភ្នំពេញ ៖ នៅថ្ងៃទី២១ ខែវិច្ឆិកា ឆ្នាំ២០១៩ នៅវេលាម៉ោង១៣និង៤០នាទី មានករណីគ្រោះថ្នាក់ចរាចរណ៍មួយរថយន្តក្រឡុកស៊ីម៉ងត៍១គ្រឿងបើកបរជ្រុលបុកចូលផ្ទះប្រជាពលរដ្ឋ បណ្តាលឲ្យក្រឡាប់ឆាបឆេះ និងសង្កត់លើក្មេងស្រីស្លាប់ម្នាក់យ៉ាងអាណោចអាធ័មនៅកន្លែងកើតហេតុ ។
ហេតុការណ៍នេះកើតឡើងនៅលើកំណាត់ផ្លូវបេតុង៥០ម៉ែត្រ ស្ថិតក្នុងភូមិប្រកា សង្កាត់ព្រៃស ខណ្ឌដង្កោ រាជធានីភ្នំពេញ ។
លោក ជឹម ស៊ីថា អធិការនគរបាលខណ្ឌដង្កោក បានឲ្យដឹងថា ភាគីរថយន្តម៉ាក HINO ពណ៌ក្រហមស ពាក់ស្លាកលេខភ្នំពេញ5A.1448 បើកបរដោយឈ្មោះ ភ្លូ ឆាង ភេទប្រុស អាយុ២០ ឆ្នាំ មុខរបរបើកបររថយន្ដ មានទីលំនៅភូមិត្រពាំងចក សង្កាត់ព្រៃវែង ខណ្ឌដង្កោ រាជធានីភ្នំពេញ (ក្រោយកើតហេតុ ត្រូវសមត្ថកិច្ចឃាត់ខ្លួន )។
ម្ចាស់ផ្ទះឈ្មោះ បង វុត្ថា ភេទប្រុស អាយុ៣២ឆ្នាំ មុខរបរជាងម៉ូតូ ស្នាក់នៅភូមិប្រកា សង្កាត់ព្រៃស ខ ណ្ឌដង្កោ រាជធានីភ្នំពេញ(ពុំមានរងរបួស)។ ចំណែកក្មេងស្រីរងគ្រោះជាកូនម្ចាស់ផ្ទះឈ្មោះ វង សុនិតា ភេទស្រី អាយុ៤ឆ្នាំ ។
លោកអធិការបានបន្តថា មុនពេលកើតហេតុ រថយន្តបើកបរពីជើងទៅត្បូង ពេលមកដល់ចំណុចកើត ហេតុរថយន្តបើកបរក្នុងល្បឿនលឿន ហើយឡើងវ៉ាស្តាំរថយន្តដែលនៅពីមុខមិនផុតក៏ជាន់ហ្វ្រាំងបណ្តាលឲ្យក្រឡាប់ចូលផ្ទះប្រជាពលរដ្ឋនៅក្បែរនោះ និងកិនក្មេងស្រីតែម្តង។
ក្នុងហេតុការណ៍នេះ បណ្តាលឲ្យខូចខាតរថយន្តខូចខាតធ្ងន់ ។ ចំណែកសាកសពត្រូវបានប្រគល់ឲ្យក្រុមគ្រួសារធ្វើបុណ្យតាមប្រពៃណី។
បច្ចុប្បន្ន គ្រោះថ្នាក់ចរាចរណ៍ខាងលើ ត្រូវបានប្រគល់ឲ្យការិយាល័យនគរបាលចរាចរណ៍ផ្លូវគោករាធានីភ្នំពេញ អនុវត្តតាមនីតិវិធី ៕
