ល្បែងស៊ីសងសំបូរបែបនៅសង្កាត់ផ្សារថ្មី៣ មានហ្គេមបាញ់ត្រី

ភ្នំពេញ៖ ល្បែងស៊ីសងOnlineដ៏សំបូរបែបនៅក្នុងសង្កាត់ផ្សាថ្មី៣ សង្ស័យមានបង្កប់ទាំងល្បែងហ្គេមបាញ់ត្រីនៅខាងក្នុង ទីតាំងនេះបើកលេង២៤ម៉ោងទទួលស្វាគមន៍គ្រប់ក្មេងទំនើងទាំងអស់ ដែលស្ថិតនៅតាមបណ្តោយផ្លូវលេខ១៥៤ សង្កាត់ផ្សារថ្មី៣ ខណ្ឌដូនពេញ។

គួររំលឹកថា កាលពីថ្ងៃទី ១២ ខែមិថុនា ឆ្នាំ២០១៩ កន្លងទៅថ្មីនេះ សម្តេច ក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រី ក្រសួង មហាផ្ទៃ បានបញ្ជាឲ្យ អាជ្ញាធររាជធានីភ្នំពេញ បង្ក្រាបល្បែងបាញ់ត្រី និងល្បែងភ្នាល់ទឹកភ្លៀង ដែលកើតមាន នៅក្នុងរាជធានីភ្នំពេញ។ ការបញ្ជានេះ បានធ្វើ ឡើងនៅចំពោះមុខអភិបាលរាជធានីភ្នំពេញ ស្នងការនគរ បាលរាជធានីភ្នំពេញ និងមេបញ្ជាការកងរាជអាវុធហត្ថរាជធានីភ្នំពេញ រួមទាំងមន្ត្រីដែលពាក់ព័ន្ធ ក្នុងពិធី ប្រកាសចូលកាន់តំណែងក្រុមប្រឹក្សារាជធានីភ្នំពេញ អាណត្តិទី៣ កាលពីថ្ងៃទី១២ ខែមិថុនា ឆ្នាំ២០១៩ នៅសាលារាជធានីភ្នំពេញ។ ប៉ុន្តែបទបញ្ជានេះយើងសង្កេតឃើញថា នៅខណ្ឌដូនពេញ ជាពិសេសនៅសង្កាត់ផ្សារថ្មី៣នេះ មិនដែលឃើញមានសកម្មភាពបង្រ្កាបទីតាំងល្បែងស៊ីសងណាមួយជាដុំកាភួននោះទេ៕