ឃាតកសម្លាប់ជនជាតិចិនកាប់បំបែកសាកសពបីកំណាត់ នៅក្រុងព្រះសីហនុត្រូវបានសមត្ថកិច្ចចាប់ខ្លួនបានហើយ ជាអំពើប្លន់ អតិថិជនមកប្តូរប្រាក់
ខេត្តព្រះសីហនុ៖ ព្រឹកថ្ងៃទី៣ ខែតុលា ឆ្នាំ២០១៩ នេះលោកឧត្តមសេនីយ៍ទោជួន ណារិន្ទ ស្នងការនគរបាលខេត្ត ព្រះសីហនុ បានអនុញ្ញាតឲ្យអ្នកសារព័ត៌មាន បានថតរូប យកព័ត៌មាន អំពីការបង្រ្កាបបទល្មើសឧក្រិដ្ឋមួយករណី (មនុស្សឃាតដោយគ្រោងទុកមួយ) ទៅលើជនរងគ្រោះជាជនជាតិចិន ហើយបានកាប់បំបែកសាកសពជាបីកំណាត់ យកទៅបោះចោលនៅក្នុងដីឡូត៍មួយកន្លែងនៅតំបន់អូរត្រេះចាស់ ភូមិ៦សង្កាត់លេខ៤ក្រុងព្រះសីហនុ។
របាយការណ៍របស់សមត្ថកិច្ចបានឲ្យដឹងថា៖ នៅថ្ងៃទី១ ខែតុលា ឆ្នាំ២០១៩ វេលាម៉ោង ៩:៣០នាទី មានប្រជាពលរដ្ឋបានមកប្តឹងរាយការណ៍ថា៖ គាត់បានឃើញសាកសព មនុស្ស នៅដីឡូត៍មួយកន្លែង ស្ថិតនៅអូរត្រេះ២ ភូមិ៦ សង្កាត់លេខ៤ ក្រុង-ខេត្តព្រះសីហនុ។
ក្រោយពេលទទួលបានព័ត៌មាននេះ លោកឧត្តមសេនីយ៍ទោជួន ណារិន្ទ ស្នងការនគរបាលខេត្ត បានដាក់ផែនការ ឲ្យកម្លាំងជំនាញចុះទៅកាន់កន្លែងកើតហេតុ ដើម្បីបើកការស៊ើបអង្កេតជាបន្ទាន់ បន្ទាប់ពីបើកភួយដែលគ្រប់ ក៏បានឃើញសាកសព ជាជនជាតិចិនភេទប្រុស ត្រូវបានឃាតករសម្លាប់ដោយកាត់ផ្តាច់បំពង់ក និងចាក់លើដងខ្លួនជាច្រើនកាំប៉ិត រួចកាត់បំណែក យកសាកសពមួយកំណាត់ខ្លួនដល់ក្បាល មកចោលនៅទីនេះ។
ក្រោយការស៊ើបអង្កេតទើបដឹងថា ជនរងគ្រោះឈ្មោះ WU CHENGHUI ភេទប្រុស ជនជាតិចិន កើតនៅថ្ងៃទី ៣១ ខែធ្នូ ឆ្នាំ១៩៩៥ មុខរបរប្តូរប្រាក់ បើកហាងនៅក្រុមទី១៤ភូមិ៤ សង្កាត់លេខ៤ក្រុងព្រះសីហនុលិខិតឆ្លងដែនលេខៈ ED7591553 ។
លោកឧត្តមសេនីយ៍ត្រីកុល ផាលីស្នងការរងទទួលផែន ព្រហ្មទណ្ឌ បានឲ្យដឹងថា៖ អំពើមនុស្សឃាតនេះ ត្រូវបានថ្នាក់ដឹកនាំអគ្គស្នងការនគរបាល ឯកឧត្តមអភិបាលខេត្ត និងលោកឧត្តមសេនីយ៍ទោជួន ណារិន្ទស្នងការនគរបាលខេត្ត ជំរុញឲ្យបើកការស៊ើបអង្កេតដោយយកចិត្តទុកដាក់បំផុត។
កម្លាំងជំនាញផែន នគរបាលព្រហ្មទណ្ឌ បានធ្វើការស្រាវជ្រាវយកចិត្តទុកដាក់ ដោយមានការចូលរួមពីព្រះរាជអាជ្ញាអមសាលាដំបូងខេត្ត រហូតដល់កំណត់មុខសញ្ញាជនសង្ស័យបាន ហើយឈានទៅចាប់ខ្លួន នៅវេលាម៉ោង២:០០ឈានចូលថ្ងៃទី២ខែតុលា ឆ្នាំ២០១៩ នៅចំណុចហាងប្តូរប្រាក់ ជាំងស៊ូ ស្ថិតនៅក្រុមទី១៤ភូមិ៤ សង្កាត់លេខ៤ ក្រុង-ខេត្តព្រះសីហនុ ជនសង្ស័យឈ្មោះ ZHOU YA YUN ភេទប្រុស អាយុ ២៩ឆ្នាំ ជនជាតិចិនមុខរបរប្តូរប្រាក់ កាន់លិខិតឆ្លងដែនលេខៈ E05801588 ស្នាក់នៅហាងប្តូរប្រាក់ជាំងស៊ូ នៅក្រុម១៤ ភូមិ៤ សង្កាត់លេខ៤ ក្រុង-ខេត្តព្រះសីហនុ ។
ចាប់យកបានវត្ថុតាង មាន៖ -កាំប៉ិតបុ័ងតោ១ដើម (អាវុធកាប់សម្លាប់ជនរងគ្រោះ)អាវយឺតដៃវែង១ពណ៌ផ្ទៃមេឃ មានប្រឡាក់ឈាម (រកឃើញកន្លែងដែលប្លុងសាកសពចោល អូរត្រេះ២ ជាអាវរបស់ជនសង្ស័យពេលធ្វើសកម្មភាពរួច យកអាវរុំសាកសព)-ខោជើងវែង ពណ៌សលាយឆ្នូតខ្មៅ ១ មានប្រឡាក់ឈាម (រកឃើញនៅកន្លែងកើតហេតុ ក្នុងហាងប្តូរប្រាក់ ជាំងស៊ូ -ខោជើងវែង ពណ៌ខ្មៅលាយឆ្នូតស ០១ មានប្រឡាក់ឈាម (រកឃើញនៅកន្លែងកើតហេតុ ក្នុងហាងប្តូរប្រាក់ ជាំងស៊ូ)-អាវយឺតដៃវែង ពណ៌សលាយឆ្នូតខ្មៅ ០១ មានប្រឡាក់ឈាម (រកឃើញនៅកន្លែងកើតហេតុ ក្នុងហាងប្តូរប្រាក់ ជាំងស៊ូ)-អាវយឺតដៃខ្លីពណ៌ស១ មានប្រឡាក់ឈាម (រកឃើញនៅកន្លែងកើតហេតុ ក្នុងហាងប្តូរប្រាក់ជាំងស៊ូ)-អាវក្រៅដៃវែង ពណ៌ស១ មានប្រឡាក់ឈាម (រកឃើញនៅកន្លែងកើតហេតុ ក្នុងហាងប្តូរប្រាក់ជាំងស៊ូ)
-រថយន្ត ០១គ្រឿង ម៉ាក LEXUS 470 ពណ៌ស ស្លាកលេខៈ ភ្នំពេញ 2AH-1611 (មធ្យោបាយដឹកជញ្ជូនសាកសពជនរងគ្រោះយកទៅប្លុងចោល) ។
ចម្លើយសារភាពរបស់ជនសង្ស័យនៅចំពោះមុខសមត្ថកិច្ចបានឲ្យដឹងថា ៖ រឿងហេតុកើតឡើង ដោយសារជនរងគ្រោះបានមានទំនាក់ទំនងជាមួយជនសង្ស័យ ដើម្បីប្តូរប្រាក់ចិនមកជាប្រាក់ដុល្លារអាមេរិក ចំនួន ៧០.០០០$ (ប្រាំពីរម៉ឺនដុល្លារអាមេរិច) លុះនៅថ្ងៃទី ៣០ ខែកញ្ញា ឆ្នាំ២០១៩ វេលាម៉ោង១៧:០០នាទី ជនរងគ្រោះបានទៅហាងប្តូប្រាក់របស់ជនសង្ស័យ ដែលមានស្លាកយីហោ ប្តូរប្រាក់ជាំងស៊ូ ស្ថិតនៅក្រុមទី១៤ ភូមិ៤ សង្កាត់៤ ក្រុង-ខេត្តព្រះសីហនុ បន្ទាប់ពីជនរងគ្រោះបានវេប្រាក់ទៅអោយជនសង្ស័យរួចរាល់ហើយ ក៏ត្រូវបាន ជនសង្ស័យប្រើកាំប៉ិតកាប់ និងចាក់សម្លាប់ជនរងគ្រោះតែម្តង ។ បន្ទាប់ពីសម្លាប់ជនរងគ្រោះរួចហើយ ជនសង្ស័យបានកាត់សាកសពជា ៣កំណាត់ រួចវេចខ្ចប់ជាមួយភួយ និងអាវដែលធ្វើសកម្មភាព និងស្បោងពណ៌ខ្មៅ រហូតដល់ម៉ោង១ រំលងអាធ្រាត្រ ឈានចូលថ្ងៃទី១ ខែតុលា ឆ្នាំ២០១៩
ជនសង្ស័យបានទៅជួលរថយន្ត១គ្រឿង ម៉ាក LEXUS 470 ពណ៌ស ស្លាកលេខៈ ភ្នំពេញ 2AH-1611 ដើម្បីដឹកសាកសពរបស់ជនរងគ្រោះយកទៅប្លុងចោលនៅកន្លែងផ្សេងៗពីគ្នា៖
កំណាត់ទី១ ពីក្បាលដល់ចង្កេះ យកទៅប្លុងចោលនៅដីឡូត៍មួយកន្លែង ស្ថិតនៅអូរត្រេះ២ ភូមិ៦ សង្កាត់៤ ក្រុងព្រះសីហនុ។
កំណាត់ទី២ ពីចង្កេះដល់ជង្គង់ យកទៅប្លុងចោលនៅដីឡូត៍មួយកន្លែង ស្ថិតនៅភ្នំ៩៦ ភូមិ៥ សង្កាត់៤ ក្រុង-ខេត្តព្រះសីហនុ។
កំណាត់ទី៣ ពីជង្គង់ដល់បាតជើង យកទៅប្លុងចោលនៅក្នុងព្រៃក្បែរអូរតែល៧ជាន់ ស្ថិតនៅ ភូមិ១ សង្កាត់៣ ក្រុង-ខេត្តព្រះសីហនុ ។
ករណីនេះសមត្ថកិច្ចជំនាញបានកសាងសុំណុំរឿងតាមនីតិវិធីបញ្ជូនទៅសាលាដំបូងខេត្ត។
