រថយន្តដឹកទំនិញក្រុមហ៊ុន នាគខៀវបើកបុកម៉ូតូបណ្តាលយុវជនម្នាក់ស្លាប់

ខេត្តកណ្តល៖  រថយន្តដឹកទំនិញគ្រឿងសំណង់របស់ក្រុមហ៊ុននាគខៀវបានបើកបុកម៉ូតូពីក្រោយយ៉ាងពេញទំហឹងក្នុងទិសដៅស្របគ្នាបណ្តាលអោយយុវជនម្នាក់ស្លាប់នៅកន្លែងកើតហេតុ។

ហេតុការណ៍នេះបានកើតឡើងកាលពីវេលាម៉ោង១៦និង២០នាទីថ្ងៃទី២៨ខែសីហាឆ្នាំ២០១៩ស្ថិតនៅលើកំណាត់ផ្លូលេខ១១៥ចំណុចភូមិខ្ពបវែងសង្កាត់កំពង់សំណាញ់ក្រុងតាខ្មៅខេត្តកណ្តាល។

សមត្ថកិច្ចបានប្រាប់ឲ្យដឹងថាតៃកុងរថយន្ដមានឈ្មោះ  នួនវ៉ន  ភេទប្រុសអាយុ៣៦ឆ្នាំមានទីលំនៅភូមិត្រពាំងអំពាក់ឃុំត្រពាំងធំស្រុកត្រាំងខេត្តតាកែវ។  ចំណែកជនរងគ្រោះដែលស្លាប់មានឈ្មោះយ៉ង់សុដារ៉ាភេទប្រុសអាយុ២២ឆ្នាំមានទីលំនៅភូមិព្រែកសំរោង៣សង្កាត់តាខ្មៅក្រុងតាខ្មៅខេត្តកណ្តាល  ។

បើតាមសាក្សីបានអោយដឹងថាមុនពេលកើតហេតុឃើញរថយន្ដម៉ាកGRA NTOពណ៌ខៀវពាក់ស្លាកលេខភ្នំពេញ3B-3634 បើកស្របទិសគ្នាជាមួយម៉ូតូម៉ាកPCXពណ៌សពាក់ស្លាកលេខភ្នំពេញ1HE- 1541 ពីកើតទៅលិច  លុះដល់ចំណុចកើតហេតុរថយន្តក៏បានជ្រុលទៅបុកម៉ូតូពីក្រោយយ៉ាងពេញទំហឹងបណ្តាលអោយអ្នកបើកបរម៉ូតូស្លាប់តែម្តង។

ភ្លាមៗនោះសមត្ថកិច្ចបានចុះទៅដល់កន្លែងកើតហេតុឃាត់ខ្លួនតៃកុងរថយន្តនិងអូសយកវត្ថុតាងទាំងពីគ្រឿងយកមករក្សាទុទុកនៅអធិការនគរបាលក្រុងតាខ្មៅដើម្បីចាត់ការបន្តរទៅតាមផ្លូវច្បាប់៕