ស្តែងៗណាស់ នេះវីដេអូថ្មីមួយទៀតមុនកើតហេតុឃើញថា ហុយផ្សេងចេញមកក្រៅ ស្រាប់តែមួយសន្ទុះក៏ឮសូរផ្ទុះ បាញ់អណ្តាតភ្លើងចេញមកធ្វើឲ្យអ្នកធ្វើដំណើរ និងអ្នកជិតៗនោះរត់ចែកជើងគ្នារកកន្លែងសុវត្ថិភាព

កន្លែងបញ្ចូលហ្គាសយីហោ LPG បញ្ចូលហ្គាសរថយន្ត ២៤ម៉ោង ត្រូវភ្លើងឆេះម៉ត់មួយប៉ប្រិចភ្នែក នៅតាមបណ្តោយផ្លូវលោកតាណឺយ ខណៈកំពុងបញ្ចូលហ្គាស បង្កឲ្យមានការកកស្ទះពេញផ្លូវ និងភ្ញាក់ផ្អើលជាខ្លាំងកាលពីម៉ោង១និង១៥នាទីរសៀល ថ្ងៃទី១៤ ខែសីហា ឆ្នាំ២០១៩ម្សិលមិញនេះ នៅតាមផ្លូវលោកតាណឺយ ទល់មុខអតីតមន្ទីរពេទ្យនាគទេព ក្នុងភូមិបន្ទាយចាស់ សង្កាត់ស្លក្រាម ក្នុងក្រុងសៀមរាប។ តាមព័ត៌មានចុងក្រោយពុំមានមនុស្សស្លាប់ទេ ក្នុងករណីផ្ទុះហ្គាសឆេះហាងបញ្ចូលហ្គាសរថយន្តមួយកន្លែងនេះ ដោយមានតែអ្នករងរបួសចំនួន១៣នាក់ ស្រីចំនួន០៣នាក់ ក្នុងនោះរបួសធ្ងន់ចំនួន០៦ នាក់ ហើយក្នុងចំណោមអ្នករងរបួសចំនួន១៣នាក់នេះ មានជនជាតិបរទេស ចំនួន០២នាក់ ។

បើតាមវីដេអូថតដោយកាម៉េរាសុវត្ថិភាពបានឲ្យដឹងថា មុនដំបូងឃើញមានហុយផ្សេងចេញពីទីនោះ ស្រាប់តែមួយសន្ទុះ ក៏ឮសូរផ្ទុះ និងបង្កជាអណ្តាតភ្លើងឡើង ចេញពីក្នុងនោះ បណ្តាលឲ្យផ្ទះអ្នកជិតខាង រងការខូចខាត បែកកញ្ចក់ខ្ទេចនៅក្នុងផ្ទះ រួចក៏នាំគ្នាជួយទាញទីយោបាញ់ទឹកដែរ ប៉ុន្តែដោយសារសន្ទុះនៃហ្គាស ធ្វើឲ្យវាឆាបឆេះកាន់តែខ្លាំង ទើបពួកគាត់នាំគ្នា រត់យកឥវ៉ាន់រៀងៗខ្លួនចេញពីផ្ទះ។