បុរសម្នាក់ជាទាហានចិត្តសាហាវ ដកកាំភ្លើងបាញ់រះប្រពន្ធខ្លួនឯង៨គ្រាប់ បណ្តាលឲ្យរងរបួសធ្ងន់

កាលវេលាម៉ោង១១និង៣០នាទីយប់ ថ្ងៃពុធ ទី៧ ខែសីហា ឆ្នាំ២០១៩ មានហេតុការណ៍ភ្ញាក់ផ្អើលមួយ បន្ទាប់ពីប្ដីបានដកកាំភ្លើងបាញ់មកលើប្រពន្ធខ្លួនឯងជាច្រើនគ្រាប់ បណ្ដាលឲ្យរងរបួសធ្ងន់ ស្ថិតតាមបណ្ដោយផ្លូវរថភ្លើង ចំណុចហាងទីរ៉ានី ក្នុងភូមិចុងថ្នល់ខាងលិច សង្កាត់ទឹកថ្លា ខណ្ឌសែនសុខ សង្ស័យប្រច័ណ្ឌ។ បុរសជាប្តី ដែលបាញ់នោះមាន ឈ្មោះ ឆោម ចំណាន អាយុ៣៩ឆ្នាំ មុខរបរជាយោធា ប្រើប្រាស់កាំភ្លើងមឫកK59បាញ់សំដៅប្រពន្ធ៨គ្រាប់ រីឯនារីរងគ្រោះជាប្រពន្ធមានឈ្មោះ ជា គីមឡាង អាយុ២៩ឆ្នាំរងរបួសធ្ងន់ត្រង់ចង្កេះ២គ្រាប់ ពោះ១គ្រាប់ ដៃស្តាំ ១គ្រាប់លើដើមទ្រូងឆ្វេង១គ្រាប់ ត្រូវបានបញ្ជូនទៅសង្រ្គោះនៅមន្ទីរពេទ្យកាល់ម៉ែត។

ក្រោយបោះបាញ់រួច បុរសជាប្តីបានព្យាយាមបើករថយន្តមួយគ្រឿង ម៉ាក HIGHLANDER ពណ៌ស ពាក់ស្លាកលេខ បន្ទាយមានជ័យ 2A-6753 រត់គេចចេញពីកន្លែងកើតហេតុ តែត្រូវបានសមត្ថកិច្ចខណ្ឌសែនសុខ ដេញភ្លាមៗរហូតដល់ចំណុចច្រកចូលហ្គ្រែនភ្នំពេញ ទើបសមត្ថកិច្ចឃាត់ប្តីបាន និងដឹកយកទៅអធិការរដ្ឋាននគរបាលខណ្ឌសែនសុខ ដើម្បីសាកសួរ និងចាត់ការតាមនិតិវិធីច្បាប់។