ឯកឧត្ដម ឧត្ដមសេនីយ៍ឯក ស ថេត អញ្ជើញចុះពិនិត្យតាមបណ្ដាគោលដៅ អនុវត្តច្បាប់ចរាចរណ៍ផ្លូវគោក
ភ្នំពេញ ៖ ឯកឧត្ដម ឧត្ដមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ នាព្រឹកថ្ងៃទី២២ ខែកក្កដា ឆ្នាំ២០១៩នេះ បានអញ្ជើញចុះពិនិត្យតាមបណ្ដាគោលដៅ អនុវត្តច្បាប់ចរាចរណ៍ផ្លូវគោក ពិសេសការរឹតបណ្ដឹង ចំពោះអ្នកបើកបរម៉ូតូ អ្នករួមដំណើរ ដែលមិនពាក់មួកសុវត្ថិភាព។
ក្នុងយុទ្ធនាការរយៈពេល១ខែ ចាប់ពីថ្ងៃទី២២ ខែកក្កដា ឆ្នាំ២០១៩នេះតទៅ គឺអ្នកបើកបរម៉ូតូ និងអ្នករួមដំណើរ ប្រសិនបើគ្មានមួកសុវត្ថិភាពពាក់នោះទេ នឹងត្រូវឃាត់ មិនឲ្យធ្វើដំណើរ រហូតទាល់តែមានមួកពាក់ ទើបឲ្យបន្តដំណើរទៅមុខទៀត។ ក្នុងយុទ្ធនាការនេះ មិនមានការផាកពិន័យជាប្រាក់ឡើយ។
ក្នុងពេលចុះពិនិត្យ ការអនុវត្តច្បាប់ចរាចរណ៍ផ្លូវគោក នាព្រឹកមិញនេះ ឯកឧត្ដម ឧត្ដមសេនីយ៍ឯក ស ថេត បានសង្កេតឃើញថា មានអ្នកបើកបរម៉ូតូ និងអ្នករួមដំណើរមួយចំនួន មិនបានពាក់មួកសុវត្ថិភាពនោះទេ។ ឯកឧត្ដម ស្នងការនគរបាលរាជធានីភ្នំពេញ បានអំពាវនាវឲ្យប្រជាពលរដ្ឋ ចូលរួមគោរពច្បាប់ចរាចរណ៍ផ្លូវគោកទាំងអស់គ្នា ពិសេសពេលធ្វើដំណើរដោយម៉ូតូ ត្រូវពាក់មួកសុវត្ថិភាព។
ឯកឧត្ដម ឧត្ដមសេនីយ៍ឯក ស ថេត ក៏បានចែកជូន នូវមួកសុវត្ថិភាពមួយចំនួន ដល់បងប្អូនប្រជាពលរដ្ឋ ដែលមិនបានពាក់មួកសុវត្ថិភាពផងដែរ ។ ជាមួយគ្នានេះ ក្នុងពេលគោរពទង់ជាតិ នាព្រឹកថ្ងៃទី២២ ខែកក្កដា ឆ្នាំ២០១៩នេះដែរ ឯកឧត្ដមស្នងការក៏បានថ្លែងប្រាប់ ដល់កម្លាំងនគរបាល រាជធានីភ្នំពេញទាំងអស់ ត្រូវធ្វើជាគម្រូល្អដល់ប្រជាពលរដ្ឋ ពោលគឺត្រូវបើកបរគោរពច្បាប់ចរាចរណ៍ ពិសេសត្រូវពាក់មួកសុវត្ថិភាព នៅពេលបើកបរម៉ូតូជានិច្ច៕
