ជនជាតិចិនស្រវឹងបេីករថយន្ត Range Rover ស៊េរីទំនើប ទៅបុកម៉ូតូខ្មែរ ស្លាប់២នាក់ភ្លាមៗ នៅម្ដុំប្រឡាយទឹកស្អុយក្បែរសាលាមុំ
ជនជាតិចិនស្រវឹងបេីករថយន្ត Range Rover ស៊េរីទំនើប ទៅបុកម៉ូតូខ្មែរ ស្លាប់២នាក់ភ្លាមៗ នៅម្ដុំប្រឡាយទឹកស្អុយក្បែរសាលាមុំ
ភ្នំពេញ៖ បុរសជាជនជាតិចិនចំនួន២នាក់ស្រវឹងជោកជាំបេីកបររថយន្តរ៉េនរ៉ូវើរមួយគ្រឿងបោះពួយយ៉ាងលឿន ដូចហោះមិនព្យាយាមបេីកវ៉ាជែងដោយខ្វះការប្រុងប្រយ័ត្ន រួចក៏ជ្រុលចង្កូតទៅបុកម៉ូតូមួយគ្រឿងទៀតចំពីមុខពេញទំហឹងបណ្តាលឲ្យឆក់យកអាយុជីវិតបុរស២នាក់ស្លាប់ភ្លាមៗយ៉ាងអាណោចអាធ័ម បង្កឲ្យមានការភ្ញាក់ផ្អើលឡេីងកាលពីវេលាម៉ោង១០និង៣០នាក់យប់ ថ្ងៃទី១៤ ខែមិថុនា ឆ្នាំ២០១៩ត្រង់ចំណុចប្រឡាយទឹកស្អុយក្បែរសាលាមុំ តាមបណ្ដោយផ្លូវ១៩៦២ ស្ថិតក្នុងភូមិគ្រាំងអង្គ្រង សង្កាត់ក្រាំងធ្នង់ ខណ្ឌសែនសុខ។
ជនរងគ្រោះដែលស្លាប់បាត់បង់ជីវិតទាំងពីរខាងលេី ទី១ជនរងគ្រោះដែលជាអ្នកបេីកបរម៉ូតូមានឈ្មោះស្រេង ជាវ អាយុ២៤ឆ្នាំ មុខរបរជាងដែក ស្នាក់នៅកន្លែងធ្វើការម្តុំផ្សារត្រពាំងដូចខាងលើ មានស្រុកកំណេីតនៅភូមិមានទ្រុង សង្កាត់ក្រាំងធ្នង់ ខណ្ឌសែនសុខ។ និងជនរងគ្រោះទី២ដែលជាអ្នកអង្គុយពីក្រោយមានឈ្មោះ យឹម សំណាង ភេទប្រុស អាយុ២៤ឆ្នាំ មុខរបរជាងដែក ស្នាក់នៅជាមួយគ្នា មានស្រុកកំណេីរនៅភូមិសំរោងទាវ សង្កាត់ក្រាំងធ្នង់ ខណ្ឌសែនសុខ។ 
តាមប្រភពព័ត៌មានពីកន្លែងកើតហេតុបានឲ្យដឹងថានៅមុនពេលកើតហេតុគេឃេីញជនរងគ្រោះទាំងពីរនាក់ខាងលេី បេីកបរម៉ូតូមួយគ្រឿងម៉ាក ហុងដាឌ្រីម ស៊េរី០១៩ ពណ៌ខ្មៅ ពាក់ស្លាកលេខ ភ្នំពេញ2HI-078។ ដែលទេីបជិះមកពីកន្លែងធ្វេីការនៅផ្តុំផ្សារត្រពាំងថ្លឹងបំរុងជិះទៅលេងផ្ទះ ដោយបេីកតាមបណ្ដោយផ្លូវ១៩៦២ ក្នុងទិសដៅពីកេីតទៅលិច។ លុះមកដល់ចំណុចកេីតហេតុ ក៏ស្រាប់តែមានរថយន្តបង្កមួយគ្រឿងម៉ាក រ៉េនរ៉ូវើរ ពណ៌ខ្មៅ ពាក់ស្លាកលេខ ភ្នំពេញ2R-0777។ បេីកបរដោយបុរសជាជនជាតិចិនចំនួន២នាក់ក្នុងស្ថានភាពស្រវឹងជោកជាំ ដែលបេីកបញ្រ្ចាសទិសដៅគ្នា និងក្នុងល្បឿនយ៉ាងលឿនដូចហោះ។ ហេីយខណៈពេលដែល រថយន្តបង្កខាងលេី ក៏បានព្យាយាមបេីកវ៉ាជែងខាងឆ្វេងរថយន្តមួយគ្រឿងទៀតមិនចាំម៉ាក រួចក៏ជ្រុលចូលផ្លូវម្ខាងទៀតទៅបុកនិងម៉ូតូខាងលើចំពីមុខពេញទំហឹង បណ្ដាលឲ្យបុរសរងគ្រោះទាំងពីរនាក់ហោះចេញពីម៉ូតូខ្ទៀតទៅចិញ្ចេីមផ្លូវបាក់កស្លាប់ភ្លាមៗយ៉ាងអាណោចអាធ័ម។ ចំណែកឯម៉ូតូបានខ្ទៀតផ្លោងចេញពីលេីផ្លូវប្រមាណ១០ម៉ែត្ររងការខូចខាតយ៉ាងដំណំ។ រីឯរថយន្តបង្ករងការខូចខាតដាច់ក្រឡេនិងក្រពឹតកាងផ្នែកខាងមុខចំហៀងខាងឆ្វេងទៅមុខលែងរួច។ ភ្លាមៗក្រោយក៏មានសមត្ថកិច្ចមូលដ្ឋានបានចុះមកអន្តរាគមន៍ដល់កន្លែងកើតហេតុ និងបានធ្វើការឃាត់ខ្លួនបុរសជាជនជាតិចិនទាំងពីរនាក់ខាងលេីនាំទៅកាន់ប៉ុស្តិ៍នគរបាលរដ្ឋបាលក្រាំងធ្នង់។
ក្រោយពេលកើតហេតុសមត្ថកិច្ចជំនាញក៏បានចុះមកធ្វេីការវាស់វែងយកម៉ូតូនិងរថយន្តបង្ករួចជាមួយអ្នកបេីកបររថយន្តបង្កទៅកាន់ការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដេីម្បីរង់ចាំធ្វើការដោះស្រាយនិងចាត់ការទៅតាមនីតិវិធីច្បាប់ជាបន្តទៀត។ ដោយសពបុរសរងគ្រោះទាំងពីរនាក់ត្រូវសមត្ថកិច្ចប្រគល់ទៅឲ្យក្រុមគ្រួសារដឹងយកទៅផ្ទះដេីម្បីធ្វេីបុណ្យទៅតាមប្រពៃណី៕
