ក្រឡាប់រថយន្តដឹកភ្ញៀវឡើងទស្សនាលើខ្នងភ្នំសំពៅ បណ្តាលឲ្យរងរបួសធ្ងន់ស្រាល១៧នាក់
បាត់ដំបង៖ ក្រឡាប់រថយន្តដឹកភ្ញៀវឡើងទស្សនាលើខ្នងភ្នំសំពៅ បណ្តាលឲ្យរងរបួសធ្ងន់ស្រាល១៧នាក់ នៅចំណុចរម្យណីយ៍ដ្ឋានលើខ្នងភ្នំសំពៅ ភូមិភ្នំសំពៅកើត ឃុំភ្នំសំពៅ ស្រុកបាណន់ ។ ហេតុការណ៍គ្រោះថ្នាក់នេះ បានកើតឡើងកាលពីថ្ងៃទី១៨ ខែមីនា ឆ្នាំ២០១៩ វេលាម៉ោង ១២៖០០នាទី ។
យោងតាមរបាយការណ៍របស់សមត្ថកិច្ចនគរបាលស្រុកបាណន់ បានឲ្យដឹងថា មានករណីក្រឡាប់រថយន្តដឹកភ្ញៀវឡើងទស្សនាលើខ្នងភ្នំសំពៅ អ្នកបើកបរឈ្មោះ សេង.សុភាព ភេទប្រុស អាយុ ២៦ឆ្នាំ រស់នៅភូមិភ្នំសំពៅលិច ឃុំភ្នំសំពៅ ស្រុកបាណន់ (អ្នកដឹកជញ្ជូនភ្ញៀវទេសចរណ៍ឡើងភ្នំដោយផ្ទុកមនុស្សច្រើន)។ សមត្ថកិច្ចបានអោយដឹងថា គ្រោះថ្នាក់ក្រឡាប់ឡាននេះ បណ្ដាលឲ្យមនុស្សរងរបួសចំនួន១៧នាក់ ធ្ងន់៩នាក់ និងស្រាល៨នាក់ ព្រមទាំងឆេះរថយន្ត ១គ្រឿង។
ករណីនេះ សមត្ថកិច្ចជំនាញបានធ្វើការឃាត់ខ្លួនអ្នកបើកបរ យកមកសាកសួរដើម្បីកសាងសំណុំរឿង បញ្ជូនទៅសាលា ដំបូងខេត្ត៕ សម្រួលដោយ៖ លោកស្រី វ.ទោ ជា សារ៉ាត់
