រថយន្តកូរ៉េដឹកចេក លួចបង្កប់ទំនិញ(សង្ស័យគេចពន្ធ) បេីកវ៉ាជែងក្នុងល្បឿនលឿន ជ្រុលទៅបុករទេះលក់បាយសម្ល បណ្ដាលឲ្យបុរសម្នាក់ស្លាប់ចោលប្រពន្ធ នៅពោធិ៍សែនជ័យ
រាជធានីភ្នំពេញ ៖ បុរសម្នាក់ដែលសាច់ញាតិអះអាងថា ជាអ្នកលក់បាយ សម្ល តាមមុខរោងចក្រ ខណៈដែលកំពុងបើកម៉ូតូសណ្តោងរុឺម៉ក ដឹកឥវ៉ាន់ត្រឡប់ទៅផ្ទះ ត្រូវបានរថយន្តកូរ៉េដឹកចេក(បង្កប់ទំនិញគេចពន្ធ) បើកបុកស្លាប់ភ្លាមៗនៅកន្លែងកើតហេតុ ខណៈសាច់ញាតិក្រុមគ្រួសារស្រែកទ្រហោយំ នឹកស្រណោះដូចជាស្រស់ៗពេក ។
ហេតុការណ៍គ្រោះថ្នាក់ចរាចរណ៍ដ៏រន្ធត់នេះ បានកេីតឡេីងកាលពីវេលាម៉ោង០៧:១០នាទីយប់ ថ្ងៃចន្ទ ទី១៨ ខែមិនា ឆ្នាំ២០១៩ ស្ថិតនៅតាមផ្លូវជាតិលេខ៤ ភូមិកន្ទោកជើង សង្កាត់កន្ទោក ខណ្ឌពោធិសែនជ័យ រាជធានីភ្នំពេញ។
តាមប្រភពពីក្រុមគ្រួសារនៃសព បានឲ្យដឹងថា ជនរងគ្រោះជាអ្នកលក់បាយ សម្ល តាមមុខរោងចក្រ ខណៈដែលដឹកឥវ៉ាន់ដឹកតាមម៉ូតូរុឺម៉កវិលទៅផ្ទះវិញ ជួបគ្រោះថ្នាក់ចរាចរណ៍ បុកជាមួយរថយន្តដឹកចេក (បង្កប់ទំនិញគេចពន្ធ) ស្លាប់ភ្លាមៗតែម្តង ដូចជាស្តែងពេកទើបឃើញមុខ មិនទាន់ដល់ផ្ទះផង ។
តាមប្រជាពលរដ្ឋបានឲ្យដឹងថា មុនកើតហេតុម៉ូតូសណ្តោងរុឺម៉កបើកពីកើតទៅលិច វ៉ាជែងរថយន្តខាងមុខ ចូលទៅបំណែកផ្លូវម្ខាងទៀត ត្រូវបានរថយន្តកូរ៉េដឹកចេក ចំណុះ២,៥តោន បើកច្រាសទិស មកបុកចំពីមុខ បណ្តាលឲ្យ អ្នកបើកម៉ូតូធ្លាក់ស្លាប់ភ្លាមៗនៅកន្លែង ឃើញសភាពមិនស្រួល អ្នកបើកបររថយន្ត ចុះរត់គេចខ្លួនបាត់ ។
ក្រោយកើតហេតុ សមត្ថកិច្ចចុះទៅជួយសម្រួលចរាចរណ៍ជៀសវាងកកស្ទះ ពិនិត្យស្លាកស្លាមលើសាកសព រួចប្រគល់ជូនក្រុមគ្រួសារ ដឹកយកទៅធ្វើបុណ្យតាមប្រពៃណី រីឯមធ្យោបាយទាំង២គ្រឿង ប្រគល់ជូនទៅការិយាល័យចរាចរណ៍ជើងគោកក្រុងភ្នំពេញ វាស់វែង យកទៅរក្សាទុក កសាងសំណុំរឿងតាមនីតិវិធី ៕
–
ទំនិញដែលបង្កប់ក្រោមចេក(សង្ស័យគេចពន្ធ)
