រថយន្តបែនដឹក បុកជាមួយរថភ្លើង សំណាងគ្មានមនុស្សរងរបួស នៅខេត្តព្រះសីហនុ
ព្រះសីហនុ៖ រថយន្តបែនដឹកបុកជាមួយរថភ្លើង បណ្តាលឱ្យរថភ្លើងធ្លាក់ចេញពីផ្លូវដែក សំណាងមិនបង្កឲ្យមានមនុស្សរបួសឡើយ។ ហេតុការណ៍ខាងលើបានកើតឡើង នៅថ្ងៃចន្ទ ៧កើត ខែមាឃ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី១១ ខែកុម្ភៈ ឆ្នាំ២០១៩ វេលាម៉ោង១០នឹង១៥នាទី លើផ្លូវដែក ត្រង់ចំណុចភូមិព្រែកទល់ ឃុំទឹកថ្លា ស្រុកព្រៃនប់ ខេត្តព្រះសីហនុ។
លោកឧត្តមសេនីយ៍អ៊ី សុខា ស្នងការរងនគរបាលខេត្តបានឲ្យដឹងថា ករណីគ្រោះថ្នាក់ចរាចរណ៍ខាងលើបង្កដោយ រថយន្តបែនដឹកដី ០១គ្រឿងម៉ាក HYUNDAI ពណ៌ ទឹកប្រាក់ គ្មានស្លាកលេខ អ្នកបើកបរមិនស្គាល់អត្តសញ្ញាណ មានទិសដៅពីលិចឆ្ពោះទៅ កើតលុះដល់ចំណុចខាងលើបានបុក រថភ្លើងដែលមានទិសដៅពីខេត្តព្រះសីហនុ ឆ្ពោះទៅ ភ្នំពេញ បណ្ដាលឲ្យធ្លាក់ក្បាលរថភ្លើងចេញពីលើផ្លូវដែក។
ចំណែកអ្នកបើកបររថយន្តរត់គេចខ្លួនបាត់ក្រោយពេលកើតហេតុ។ រីឯវត្ថុតាង រថយន្ត ០១គ្រឿងបានយកមករក្សាទុកនៅអធិការដ្ឋាននគរបាលស្រុកព្រៃនប់ ៕សហការី
