ឃាត់ខ្លួនជនសង្ស័យម្នាក់ ភ្ជង់ក យុវតីម្នាក់ប្លន់យកទ្រព្យសម្បត្តិ នៅបាត់ដំបង!
ខេត្តបាត់ដំបង ៖ ឃាត់ខ្លួនជនសង្ស័យម្នាក់ ករណីលួចមានស្ថានទម្ងន់ទោស (ប្រើអាវុធកណ្តៀវ) ភ្ជង់កជនរងគ្រោះយកទ្រព្យសម្បត្តិកាលពីថ្ងៃទី៣០ ខែវិច្ឆិកា ឆ្នាំ២០១៨ នៅចំណុចក្រុមទី០៦ ភូមិរំចេក៤ សង្កាត់រតន: ក្រុងបាត់ដំបង ខេត្តបាត់ដំបង។
ជនសង្ស័យមានឈ្មោះ ស៊ុ រតន: ភេទប្រុស អាយុ១៧ឆ្នាំ រស់នៅភូមិអូរចារ សង្កាត់អូរចារ ក្រុងបាត់ដំបង ខេត្តបាត់ដំបងបានជិះម៉ូតូ Honda Dream ពណ៌ក្រហម មកឈប់នៅចំណុចកើតហេតុខាងលើ រួចធ្វើសកម្មភាព យកកណ្តៀវភ្ជង់កជនរងគ្រោះ ភេទស្រី អាយុ២៤ឆ្នាំ មានទីលំនៅក្រុងបាត់ដំបង យកទូរស័ព្ទដៃម៉ាកអុបប៉ូ ពណ៌ទឹកប្រាក់១គ្រឿង, កាបូបស្បែកពណ៌ត្នោត០១ , អត្តសញ្ញាណប័ណ្ណចំនួន១សន្លឹកĪ , លិខិតឆ្លងដែន០១ ក្បាល និងប្រាក់ដុល្លារ៥០ដុល្លារ រួចគេចខ្លួន។
សមត្ថកិច្ចបានស្រាវជ្រាវមុខសញ្ញានេះ លុះដល់ម៉ោង២រសៀល កម្លាំងជំនាញអធិការក្រុង និងកម្លាំងជំនាញការិយាល័យកំរិតធ្ងន់ បានធ្វើការឃាត់ខ្លួនជនសង្ស័យម្នាក់ និងរួមទាំងវត្ថុតាង យកមកការិយាល័យកំរិតធ្ងន់ដើម្បីចាត់វិធានការតាមផ្លូវច្បាប់តែម្តង៕
