ឡើងសាហាវ! គ្រាន់តែរឿងចតរថយន្ត ដកកាំភ្លើងគំរាម និងអាមេបាញ់២ដងតែមិនផ្ទុះ… ផ្អើលផ្លូវចូលវិមានសពទាំងយប់!

រាជធានីភ្នំពេញ ៖ រឿងមិនគួរនឹងកើតសោះ គ្រាន់តែរឿងកន្លែងចតរថយន្តបុរស២នាក់ជជែកគ្នាតឹងសរសៃ.ក រហូតឈានដល់ប្រើហឹង្សាដាក់គ្នាទៅវិញទៅមកត្រូវបានសមត្ថកិច្ចចុះទៅនាំខ្លួនយកមកសាកសួរដោយទាំងអ្នករត់រឺម៉កកង់បីម្នាក់ទៀតផង កាលពីម៉ោង២០និង៣០នាទី យប់ថ្ងៃទី០១ ខែធ្នូ ឆ្នាំ២០១៨ នៅផ្លូវបេតុងចូលវិមានសពភូមិក្បាលដំរី២ សង្កាត់កាកាប២ ខណ្ឌពោធិ៍សែនជ័យ។

ជនត្រូវឃាត់ទី១ ឈ្មោះ គឹម ពេជ្រ ភេទប្រុស អាយុ៤៩ឆ្នាំ មុខរបរ យោធា ស្នាក់នៅភូមិព្រៃទា៣ សង្កាត់ចោមចៅ៣ ខណ្ឌពោធិ៍សែនជ័យ ជាអ្នកបើករថយន្ត Highlander ពណ៌ទឹកប្រាក់ពាក់ ស្លាកលេខភ្នំពេញ 2AA-4485 ឃាត់ខ្លួន និងដកហូតកាំភ្លើងខ្លី ម៉ាករ៉ូឡូ មួយដើម ។ ទី២ ឈ្មោះ សួន សុភ័ក្រ ភេទប្រុស អាយុ២០ឆ្នាំ មុខរបររត់កង់បី ស្នាក់នៅភូមិព្រៃទា ៣ សង្កាត់ចោមចៅ៣ ខណ្ឌពោធិ៍សែនជ័យ ។ ទី៣ ឈ្មោះ ឆន នាវៃ ភេទប្រុស អាយុ៣៦ឆ្នាំ មុខរបរបើកបរ ស្នាក់នៅភូមិត្រាចកោះ ឃុំក្រាំងលាវ ស្រុកបាទីខេត្តតាកែវ ជាអ្នកបើកបរ រថយន្តសាំយ៉ុងពណ៌ស្លែ ពាក់ស្លាកលេខ ភ្នំពេញ2U-3390 រងរបួសពោមុខ និងបែកក្បាលទៅពេទ្យ។ប្រភពបានឲ្យដឹងថាមុនកើតហេតុឃើញបុរសម្នាក់បើករថយន្តសាំយ៉ុង ពណ៌ស្លែ ស្លាកលេខភ្នំពេញ2U-3390 ដឹកជនជាតិចិនមានស្រីមានប្រុសជាង១០នាក់មកចូលហាង ក្បែរកន្លែងកើតហេតុ ហើយពេលភ្ញៀវចុះអស់ហើយបាន បើករថយន្តមកចតម្ខាងផ្លូវ ពេលនោះមានបុរសម្នាក់ទៀតបានបើករថយន្ត Highlander ពណ៌ទឹកប្រាក់ ពាក់ស្លាកលេខភ្នំពេញ 2AA-4485 មកដែរបានប្រាប់ទៅអ្នកបើករថយន្តសាំយ៉ុង អោយថយក្រោយបន្តិចពីព្រោះកន្លែងដែលចតនេះ ជាចំណតគាត់យូរឆ្នាំហើយ ក្រោយមកស្រាប់តែឃើញប៉ះសំដីនិងគ្នារហូតឈានប្រើហឹង្សាផង ពេលនោះអ្នករត់កង់បីម្នាក់ ដែលស្គាល់បុរសបើករថយន្ត Highlander ឃើញវាយគ្នាចឹង បានចូលទៅព្រួតជួយវាយថែម បណ្តាលអោយអ្នកបើករថយន្តសាំយ៉ុងរបួសប៉ោងមុខនិងបែកក្បាលយ៉ាងដំណំ ។

ប្រភពបានបន្តថាក្រោយហឹង្សាកើតឡើងសមត្ថកិច្ចមូលដ្ឋានបានទៅអត្តរាគមន៍ និងបាននាំខ្លួនបុរស៣នាក់ខាងលើ មកធ្វើការសាកសួរនៅប៉ុស្តិ៍នគរបាលរដ្ឋបាលកាកាប២ ។

ប្រភពពីសមត្ថកិច្ចបានឲ្យដឹងថាក្រោយពីនាំយកទៅសាកសួរឃើញថាបុរសអ្នកបើករថយន្តសាំយ៉ុងមានសភាពមិនសូវស្រួលក្រុមគ្រួសារបានសុំយកទៅពេទ្យដើម្បីព្យាបាលសិនក្រោយពីឆ្លងយោបល់ថ្នាក់លើក៍បានអនុញាតិអោយនាំទៅពេទ្យពេលអោយចេញទៅពេទ្យស្រាប់តែភាគីម្ខាងទៀតមិនសុខចិត្តបានដកកាំភ្លើងខ្លីម៉ាករ៉ូឡូចេញពីក្នុងហោប៉ៅខោមកគំរាមអ្នករបួសនិងសមត្ថកិច្ចព្រមទាំងកេះកៃបាញ់គំរាម២ដងតែកាំភ្លើងមិនផ្ទុះពេលនោះសមត្ថកិច្ចក៍ល្បួងនិងដកហូតកាំភ្លើងខាងលើបានយកមករក្សាទុក។

ពាក់ព័ន្ធហឹង្សាចុងក្រោយដកកាំភ្លើងគំរាមនិងបាញ់២ដងមិនផ្ទុះខាងលើនេះត្រូវបានសមត្ថកិច្ចធ្វើការឃាត់ខ្លួនបុរស២នាក់យកមកផ្នែកជំនាញនៃអធិការដ្ឋាននគរបាលខណ្ឌពោធិ៍សែនជ័យតែម្តង ៕