តារាប្រុសស្រី ៤ រូប បោះជំហានពីអ្នករាំ ក្លាយជាតារាចម្រៀង

ជាការពិត បើគិតមកដល់ពេលនេះមានតារាប្រុសស្រីជាច្រើនណាស់មកហើយ ដែលទទួលបានកេរ្តិ៍ឈ្មោះល្បីល្បាញក្នុងវិស័យសិល្បៈ ហើយក៏មានខ្លះទៀតក៏បានបោះបង់អាជីពជាតារាទាំងពាក់កណ្តាលទី ដោយមូលហេតុផ្សេងៗគ្នា។

ក្នុងនោះ បើលើកយកពីតារាចម្រៀងស្រី-ប្រុស ៤ រូប កំពុងតែបន្តដំណើរលើវិថីសិល្បៈរួមមានលោក វណ្ណា ស័ក្ត កញ្ញា តី កញ្ញា Bee Mo ក្រុម 2TheMoon និង កញ្ញា Vivy គឺបានក្តោបក្តីស្រមៃរបស់ខ្លួនយ៉ាងជាប់ តាំងពីម្នាក់ៗដំបូងឡើយជាអ្នករាំរហូតបានក្លាយជាតារាចម្រៀង។

១. លោក វណ្ណា ស័ក្ត

បើគិតមកដល់ពេលនេះ រយៈពេលប្រមាណជាជាង ២០ ឆ្នាំ ហើយ ដែលកូនប្រុសរបស់តារាកំប្លែងជើងចាស់លោកយាយ ណាង គឺ លោក វណ្ណា ស័ក្ត បានបោះជំហានលើវិថីសិល្បៈ ដោយដំបូងឡើយ លោក គឺជាអ្នករាំក្នុងក្រុមរាំល្បីឈ្មោះមួយរបស់ស្ថានីយទូរទស្សន៍ប៉ុស្តិ៍លេខ ៥ និង ទូរទស្សន៍មួយចំនួនទៀត។ យ៉ាងណា ដោយសមត្ថភាព ទេពកោសល្យនៃការច្រៀង និង ភាពតស៊ូ លោក វណ្ណា ស័ក្ត ក៏បានក្លាយទៅជាតារាចម្រៀងអាជីពនៅក្នុងផលិតកម្ម M។

២. កញ្ញា តី

ដូចមហាជនបានជ្រាបមកហើយ កញ្ញា តី ត្រូវបានចាប់ផ្តើមទទួលបានកេរ្តិ៍ឈ្មោះក្រោយពីកញ្ញាបានចេញនូវបទចម្រៀងមួយបទក្រោមចំណងជើងថា «តី វាយមួយលុយ» ហើយបទនេះ ជាដំណើរដំបូងនៃការអភិវឌ្ឍន៍ខ្លួនពីអ្នករាំ ក្លាយទៅជាតារាចម្រៀងរបស់កញ្ញា។ កញ្ញា តី ត្រូវបានគេដឹងថា នាងគឺជាអ្នករាំអាជីពដ៏ល្បីឈ្មោះ និង ជាអ្នករាំផ្ទាល់របស់អ្នកនាង មាស សុខសោភា ថែមទៀតផង។ យ៉ាងណា ដោយសមត្ថភាពនៃការច្រៀង និង រ៉េប ព្រមទាំងមានការជម្រុញជួយជ្រោមជ្រែងពីរៀមច្បង កញ្ញា តី ក៏បានក្លាយទៅជាតារាចម្រៀងប្រចាំផលិតកម្មរាម ជាមួយនឹង អ្នកនាង មាស សុខសោភា ផងដែរ។

៣. កញ្ញា Bee Mo

សមាជិកក្រុមចម្រៀង 2TheMoon និង ជាពិធិការិនី កញ្ញា Bee Mo ក៏មានអតីតកាលជាអ្នករាំដូចគ្នាដែរ។ យ៉ាងរយៈពេលត្រឹមជាង ១ ឆ្នាំ ចុងក្រោយនេះ កញ្ញាបានពង្រឹងសមត្ថភាពក្លាយទៅជាតារាចម្រៀង និង ជាពិធីការិនីមួយរូបនៅក្នុងកម្មវិធី «3 Fun» កម្មវិធី «Let’s Chat Don’t Cheat» និង កម្មវិធីមួយចំនួនទៀតរបស់ 3 Fun Channel Cambodia ផងដែរ។

៤. កញ្ញា Vivy

កញ្ញា Vivy គឺជា ASK Team ដែលជាក្រុមរាំរបស់អ្នកនាង ឱក សុគន្ធកញ្ញា។ សព្វថ្ងៃ កញ្ញា Vivy ក៏នៅតែបន្តជាអ្នករាំក្នុងក្រុមរបស់កំពូលតារាចម្រៀងប្រចាំផលិតកម្មហង្សមាស ព្រមទាំងបានក្លាយជាតារាចម្រៀងមួយរូបផងដែរ។ កន្លងមក កញ្ញាក៏ធ្លាប់បានឡើងច្រៀងរួមគ្នានឹងអ្នកនាង ឱក សុគន្ធកញ្ញា ដូចគ្នាដែរ៕