តារាច្រើនរូបព្រួយចិត្តដេកមិនលក់ បន់ស្រន់ និង រំលែកទុក្ខទាំងយប់ ពេលទទួលដំណឹងហេតុការណ៍លិ-ចទូកដ
នៅយប់ថ្ងៃទី ១៣ ខែតុលា ឆ្នាំ ២០២២ មានករណីលិចទូកដទទឹង នៅស្រុកលើកដែក ដែលបានកើតហេតុកាលពីវេលាម៉ោង ១៩ និង ០០ នាទី ស្ថិតនៅចំណុច ទូកដទទឹង ស្ថិតនៅភូមិកោះចំរើន ឃុំកំពង់ភ្នំ ស្រុកលើកដែក ខេត្តកណ្ដាល។
ករណីខាងលើនេះបណ្ដាលឱ្យលិចទូកដទទឹង បាត់ខ្លួនសិស្សសាលាជាច្រើននាក់ ដែលមានទីលំនៅកន្លែង ភូមិឃុំកើតហេតុខាងលើ ហើយកម្លាំងអធិការដ្ឋាននគរបាលស្រុកលើដែកបានចុះសហការជាមួយកម្លាំងប៉ុស្តិ៍រដ្ឋបាលកំពង់ភ្នំ ប្រជាការពារ និង ប្រជាពលរដ្ឋ ចុះស្វែងរក និង ជួយសង្គ្រោះ។
ខណៈទទួលដំណឹងពីហេតុការណ៍លិចទូកដ៏រន្ធុតនេះដែរ ឃើញថាលើបណ្ដាញសង្គមហ្វេសប៊ុក ក៏មានអ្នកសិល្បៈជាច្រើនបានធ្វើការចែករំលែកភ្ជាប់ជាមួយនឹងសារបង្ហាញពីក្ដីបារម្ភធ្វើការបន់ស្រន់ចំពោះក្មេងៗឱ្យមានសុវត្ថិភាព ព្រមទាំងក៏បានធ្វើការចូលរួមរំលែកទុក្ខដល់ក្មេងៗដែលបានបាត់បង់ជីវិតផងដែរ។ តារាខ្មែរជាច្រើនដួងនោះរួមមាន៖
១. ហ្សូណូ
«បួងសួងព្រះម៉ែគង្គា ទេវតាគ្រប់ព្រះអង្គ សូមថែរក្សានឹងរកឃេីញសិស្សទាំងអស់ដោយសុវត្ថិភាព»
២. ណុប បាយ៉ារិទ្ធ
«សូមវត្ថុសក្តិសិទ្ធជួយបីបាច់រក្សាក្មេងៗដែលបាត់ខ្លួនដោយសារលិចដែរ ឱ្យមានជីវិតត្រឡប់មកវិញផងចុះ»
៣. នីកូ
«បួងសួងព្រះម៉ែគង្គា ទេវតាគ្រប់ព្រះអង្គ សូមឱ្យរកឃើញសិស្សទាំងអស់ដោយសុវត្ថិភាព»
៤. ម៉ា ច័ន្ទបញ្ញា
«សូមព្រះម៉ែគង្គា និង សេចក្ដីល្អទាំងឡាយជួយបំភ្លឺផ្លូវមួយដ៏អភិនិហាដល់ក្មេងៗដែលនៅមិនទាន់រកឃើញ ឬ រកឃើញហើយឆ្លងផុតពីគ្រោះថ្នាក់ និង មិនមានបញ្ហាសូម្បីតែម្នាក់ផង»
៥. ហេង នរៈសក្កដា
«សូមចូលរួមរំលែកទុក្ខដ៏ក្រៀមក្រំដល់ក្រុមគ្រួសារក្មេងៗ ដែលបានជួបគ្រោះថ្នាក់លិចទូក ក្នុងដំណើរវិលត្រលប់ពីសាលារៀនរបស់ពួកគេ សូមបួងសួងឲ្យឆាប់រកឃើញអ្នកដែលបាត់ខ្លួនផងចុះ»
៦. សុខ ពិសី
«នាងខ្ញុំសូមចូលរួមរំលែកទុក្ខផង ខ្លោចចិត្តណាស់លោកអើយ»
៧. ពូឃ្លាំង
«សូមចូលរួមរំលែកទុក្ខដ៏ក្រៀមក្រំ ដល់ក្រុមគ្រួសារក្មេងៗ ដែលបានជួបគ្រោះថ្នាក់លិចទូក ក្នុងដំណើរវិលត្រលប់ពីសាលារៀនរបស់ពួកគេ សូមបួងសួងឲ្យឆាប់រកឃើញអ្នកដែលបាត់ខ្លួន»
៨. តន់ ច័ន្ទសីម៉ា
«សូមចូលរួមរំលែកទុក្ខដ៏ក្រៀមក្រំ ដល់ក្រុមគ្រួសារក្មេងៗ ដែលបានជួបឧប្បទ្ទវហេតុលិចទូក សូមបួងសួងឲ្យឆាប់រកឃើញក្មេងៗដែលបាត់ខ្លួន សែនអាណិត»
