មានខ្សែជីវិតតស៊ូ ដើរស្ទូចត្រីដាច់យប់ជាមួយឪពុក ពេលនេះកុមារី ថា ស្រីណុច ត្រូវសម្បុរជនម្នាក់ប្រកាសតាមរក
ពិតណាស់ មកដល់រាត្រីថ្ងៃទី ០៨ ខែតុលា ឆ្នាំ ២០២២ នេះ កម្មវិធីប្រឡងចម្រៀងលំដាប់ពិភពលោក The Voice Kids Cambodia រដូវកាលទី ៣ បានឈានដល់វគ្គប្រឡងប្រជែង The Blind Audition សប្ដាហ៍ទី ២ ហើយ ដែលឃើញក្នុងសប្ដាហ៍នេះ ពិតជាគួរឱ្យចាប់អារម្មណ៍ខ្លាំងចំពោះបេក្ខភាពកុមារជាច្រើនរូបដែលបង្ហាញសមត្ថភាពសុទ្ធសឹងតែមានសំឡេងពីរោះៗ និង ចំណុចទាក់ទាញរៀងៗខ្លួន។
ដោយឡែក ក្នុងវគ្គ The Blind Audition សប្ដាហ៍ទី ២ នេះដែរ ក្នុងចំណោមបេក្ខភាពកុមារដែលបានបង្ហាញសមត្ថភាព ឃើញថាលើបណ្ដាញសង្គមមហាជន ជាពិសេសអ្នកគាំទ្រតាមដានកម្មវិធីនេះ បានផ្ទុះចាប់អារម្មណ៍ និង ធ្វើការចែករំលែកខ្លាំង ខណៈបានឃើញកុមារីអាយុ ១០ ឆ្នាំ មកពីខេត្តមណ្ឌលគិរី ថា ស្រីណុច បង្ហាញសមត្ថភាព និង និយាយរៀបរាប់ពីជីវិតតស៊ូទាំងវ័យក្មេងរបស់នាងយ៉ាងរំជួលចិត្ត។
ជាមួយគ្នានោះ ឃើញថាទោះបីជាការបង្ហាញសមត្ថភាពរបស់កុមារីរូបនេះ មិនអាចទទួលបានការបង្វិលកៅអីពីគណៈកម្មការអាចទៅវគ្គបន្តមែន តែនាងកំពុងធ្វើឱ្យមហាជនអ្នកតាមដានកម្មវិធីនេះ បង្ហាញការចាប់អារម្មណ៍ដោយក្ដីអាណិតរំជួលចិត្តស្រក់ទឹកភ្នែកតាមគ្រប់គ្នា ខណៈបានស្ដាប់ពីជីវិតពិតរបស់នាងកម្សត់ និង មានការតស៊ូខ្លាំង ដោយពេលនោះដែរក៏ធ្វើឱ្យគណៈកម្មការទាំង ៣ រូប ធ្វើការលួងលោមទាំងអារម្មណ៍អួលអាក់អាណិតដល់រូបនាងផងដែរ។
យ៉ាងណាមិញ ក្រោយមើលឃើញពីខ្សែជីវិត និង ការតស៊ូរបស់កុមារី ថា ស្រីណុច នោះ នៅថ្ងៃួី ០៩ ខែតុលា ឆ្នាំ ២០២២ កន្លងទៅនេះ ក៏ស្រាប់តែមានសម្បុរសជនជាម្ចាស់ហាងលក់ផលិតផលថែសម្រស់ម្នាក់បានប្រកាសចង់ជួប និង ជួយដល់រូបនាង ដោយម្ចាស់ហាងនោះបានរៀបរាប់ថា ៖ «សួស្តីបងប្អូនទាំងអស់ ខ្ញុំមាននិស្ស័យជាមួយក្មេងស្រីក្នុងរូបមានឈ្មោះ ថា ស្រីណុច ខ្សែជីវិតរបស់គាត់កម្សត់ពេកហើយ ខ្ញុំបានមើល The Voice Kids Cambodia បានស្តាប់គាត់រៀបរាប់ហើយស្រក់ទឹកភ្នែក បើឃើញហើយអាចឆាតមកមីងបានតាមផេកនេះ។ តើគាត់មាន telephone ទេ ? ប្រសិនមានឱកាស មីងអាចជួបក្មួយស្រីនៅខែ ១ I Love you girl»៕
