ពិធីសម្ពោធដាក់អោយប្រើប្រាស់ផ្លូវបេតុង ០១ខ្សែ និងចែកអំណោយមនុស្សធម៍ ជូនគ្រួសារពលរដ្ឋដែលមានជីភាពខ្វះខាត ចំនួន ១៥០គ្រួសារ នៅក្នុងសង្កាត់សាលាកំរើក….

ក្រុងសៀមរាប: នៅថ្ងៃទី១៩ ខែកញ្ញា ឆ្នាំ ២០២២នេះ លោកសាម ឡន ចៅ សង្កាត់សាលាកំរើក បានរៀបចំពិធីសម្ពោធ ដាក់អោយប្រើប្រាស់ ផ្លូវបេតុងមួយខ្សែ ប្រវែង៧៥៤ម៉ែត្រ ទទឹង៤ម៉ែត្រ ស្ថិតនៅភូមិវត្តស្វាយ និងជួបសំណេះសំណាល ចែកអំណោយមនុស្សធម៍ របស់ អង្គការស្រលាញ់ការរីកចម្រើនប្រជាជន ជូនគ្រួសារពលរដ្ឋ ដែលមានជីភាពខ្វះខាត ចំនួន១៥០គ្រួសា នៅក្នុងសង្កាត់សាលាកំរើក ក្រុងសៀមរាប ខេត្តសៀមរាប ។

ផ្លូវបេតុងមួយខ្សែរដែលត្រូវបានសម្ពោធដាក់អោយប្រើប្រាស់នាឱកាសនេះ មានប្រវែង៧៥៤ម៉ែត្រ ទទឹង៤ម៉ែត្រ មានទីតាំងស្ថិតក្នុងភូមិវត្តស្វាយ ភ្ជាប់ពីខាងត្បូងផ្លូវគោកស្រិត ទៅដល់ផ្លូវបេតុង ទៅភ្នំក្រោម(មុខវត្តស្វាយ) ដែលជាគម្រោងមូលនិធិរបស់រដ្ឋបាលសង្កាត់សាលាកំរើក ។ ដោយឡែកអំណោយមនុស្សធម៍ ដែលនាំមកចែកជូនគ្រួសារពលរដ្ឋដែលមានជីភាពខ្វះខាតចំនួន១៥០គ្រួសា នាឱកាសនេះ គឺបានការជួយឧបត្ថម្ភ ពី អង្គការស្រលាញ់ការរីកចម្រើនប្រជាជន ដោយក្នុងមួយគ្រួសារ ទទួលបាន អង្ករ ២០គីឡូក្រាម និងគ្រឿងឧបភោគបរិភោគ ០១កញ្ចប់ផងដែរ។

លោក សាម ឡន ចៅសង្កាត់ សាលាកំរើក បានមានប្រសាសន៍ថា ផ្លូវបេតុងនេះ ជាសមិទ្ធិផលថ្មីមួយទៀតនៅក្នុងភូមិវត្តស្វាយ ដែលពីមុនផ្លូវនេះជាផ្លូវដីលំ ។ ផ្លូវបេតុងថ្មីមួយខ្សែនេះ នឹងជួយសម្រួលដល់ការធ្វើដំណើររបស់បងប្អូនប្រជា ពលរដ្ឋទូទៅអោយមានភាពងាយស្រួល ។ លោក ចៅសង្កាត់បានបន្តទៀតថា សមិទ្ធផលទាំងនេះ គឺជាគម្រោងផែនការអភិវឌ្ឍន៍ជាក់ស្តែងត្រឹមត្រូវ របស់រដ្ឋបាលសង្កាត់សាលាកំរើក ក្នុងគោលដៅបម្រើផលប្រយោជន៍រួមរបស់ប្រជាពលរដ្ឋ និង បង្កើនល្បឿននៃការអភិវឌ្ឍ តាមមូលដ្ឋាន និងពង្រឹងប្រជាធិបតេយ្យ នៅរដ្ឋបាលថ្នាក់ក្រោមជាតិ ក្នុងការលើកស្ទួយជីវភាពរស់នៅរបស់ប្រជាពលរដ្ឋ ដើម្បីរួមចំណែកកាត់បន្ថយភាពក្រីក្រនៅក្នុងមូលដ្ឋាន ។

ជាមួយគ្នានេះ លោកចៅសង្កាត់ក៏បានអំពាវនាវ ជាថ្មីម្តងទៀត ដល់បងប្អូនប្រជាពលរដ្ឋ សូមអោយចូលរួមជួយថែរក្សាសមិទ្ធផលនេះ និង គ្រប់គ្រងសំរាមអោយបានល្អ ដើម្បីចូលរួមចំណែកលើកកម្ពស់សោភ័ណ្ឌភាពទីក្រុងសៀមរាបយើង ឱ្យសាកសមជា ទីក្រុងទេសចរណ៍ និងបានថ្លែងអំណរគុណ ចំពោះ អង្គការស្រលាញ់ការរីកចម្រើនប្រជាជន ដែលតែងតែ ចូលរួមចំណែកជួយ ដល់ពលរដ្ឋដែលមានជីវភាពខ្វះខាត នៅក្នុងសង្កាត់សាលាកំរើកផងដែរ ៕