សំណាងណាស់ មនុស្សរងរបួសស្រាល៣នាក់ ខណ:រថយន្តFord Ranger បុករថយន្ត១ គ្រឿង និងម៉ូតូ១គ្រឿង ធ្លាក់ស្នាមភ្លោះ

បន្ទាយមានជ័យ៖ រថយន្តFord Ranger បុករថយន្ត១ គ្រឿង និងម៉ូតូ១គ្រឿង ក្រឡាប់ធ្លាក់ស្នាមភ្លោះ សំណាងមនុស្សត្រឹមរងរបួសស្រាល៣នាក់ ហេតុការណ៍នេះបានកើតឡើង នៅវេលាម៉ោង១៧និង៥០នាទី ថ្ងៃទី២២ ខែមករា ឆ្នាំ២០២១ នៅតាមបណ្តោយផ្លូវជាតិលេខ៥ ទល់មុខអធិការដ្ឋាននគរបាលស្រុកអូរជ្រៅ ភូមិយាងថ្មីឃុំកូប ស្រុកអូរជ្រៅ។
នគរបាលជំនាញចរាចរណ៍បានឲ្យដឹងថា ពេលកើតហេតុ មានរថយន្តFord Ranger ពាក់ស្លាកលេខ ភ្នំពេញ(BE-9556) ពណ៌ខ្មៅ បានបុករថយន្តម៉ាកកាម៉ារី ចង្កូតស្តាំពណ៌ខ្មៅ ពីក្រោយ ហើយខ្ទាតទៅបុកម៉ូតូហុងដាMSXមួយទៀតពាក់ស្លាក បាត់ដំបង 1AA-3527 ពណ៌ក្រហម បើកបរក្នុងគោលដៅពីទិសកើតទៅទិសខាងលិចស្របគ្នាបណ្ដាលឲ្យអ្នកបើកបរម៉ូតូឈ្មោះ ភាព ផានិត ភេទអាយុ ២១ឆ្នាំ រស់នៅភូមិអូរប្ញស្សី សង្កាត់ផ្សារកណ្តាលក្រុងប៉ោយប៉ែត ខេត្តបន្ទាយ មានជ័យ រលាត់ខ្នងពីក្រោយ (រងរបួសស្រាល)។
សមត្ថកិច្ចបានឲ្យដឹងទៀតថា អ្នកបើករថយន្តកាម៉ារី ឈ្មោះជា ហេង ភេទប្រុស អាយុ៣០ឆ្នាំ (របួសស្រាល ) អ្នករួមដំណើរប្រពន្ធឈ្មោះ ខាត់ ស្រីពៅ ភេទស្រី អាយុ ២៣ ឆ្នាំ នៅភូមិដូចប្តី (របួសស្រាល) អ្នកទាំងពីរ រស់នៅភូមិ២ សង្កាត់កំពង់ស្វាយ ក្រុងសិរីសោភណ័ខេត្តបន្ទាយមានជ័យ។
ក្រោយពេលកើតហេតុ ម្ចាស់រថយន្ត Ford Ranger បានរត់ចុះពីលើរថយន្តគេចបាត់ខ្លួនស្រមោល ចំណែករថយន្ត0២គ្រឿង និងម៉ូតូ ០១គ្រឿងរក្សាទុក នៅអធិការដ្ឋាននគរបាលស្រុកអូរជ្រៅ ដើម្បីរងចាំភាគីពាក់ព័ន្ធមកដោះស្រាយនៅពេលក្រោយ៕