រន្ធត់ណាស់ នារីម្នាក់ស្លាប់ និងម្នាក់ទៀតរងរបួសធ្ងន់ ដោយករណីគ្រោះថ្នាក់ចរាចរណ៍ នៅស្រុកស្វាយលើខេត្តសៀមរាប

សៀមរាប៖ នៅថ្ងៃទី១៦ ខែធ្នូ ឆ្នាំ២០២០ វេលាម៉ោង១៤ និង៣០នាទី ត្រង់ចំណុចមុខដីចម្ការឈ្មោះ អាង សំអាត ស្ថិតនៅភូមិចាន់ហៀរ ឃុំបឹងមាលា ស្រុកស្វាយលើ ខេត្តសៀមរាប មានករណីគ្រោះថ្នាក់ចរាចរណ៍ដ៏រន្ធត់រវាងរថយន្ត និងម៉ូតូ បើកបរបញ្ច្រាស់ទិសគ្នា បណ្តាលឲ្យនារី១នាក់ស្លាប់ និងរងរបួសធ្ងន់១នាក់ ។

ករណីគ្រោះថ្នាក់ចរាចរណ៍ខាងលើនេះ បង្កដោយរថយន្ត ម៉ាក Toyota Hilux ពណ៌ស ស៊េរីឆ្នាំ1993 ពាក់ផ្លាកលេខ ភ្នំពេញ គ-1853 ភព2 អ្នកបើកបរឈ្មោះ រាំ ភារ័ត្ន ភេទប្រុស អាយុ ២១ឆ្នាំ រស់នៅភូមិខ្វាវ ឃុំខ្វាវ ស្រុកជីក្រែង ខេត្តសៀមរាប លុះបើកបរមកដល់ចំណុចកើតហេតុបានបុកម៉ូតូ០១គ្រឿង ម៉ាក Honda Dream ពណ៌ខ្មៅ ស៊េរីឆ្នាំ២០១៥ ពាក់ផ្លាកលេខ សៀមរាប 1T-4803 អ្នកបើកបរឈ្មោះ មី ស្រីពេជ្រ ភេទស្រី អាយុ២០ឆ្នាំ នៅភូមិចុងស្ពាន ឃុំខ្វាវ ស្រុកជីក្រែង បានស្លាប់នៅនឹងកន្លែង កើតហេតុ មានអ្នករួមដំណើរជាមួយ ឈ្មោះ អន ថុក ភេទស្រី អាយុ១៩ឆ្នាំ នៅភូមិចុងស្ពាន ឃុំខ្វាវ ស្រុកជីក្រែង រងរបួសធ្ងន់ បានបញ្ជូនទៅមន្ទីរពេទ្យបង្អែកស្រុកសូទ្រនិគម ។

មូលហេតុ៖ អ្នកបើកបររថយន្តបើកបរក្នុងល្បឿនលឿន ហើយបានរេចង្កូតទៅបុកម៉ូតូបណ្ដាលឲ្យស្លាប់និងរបួសតែម្ដង ។

ក្រោយពេលកើតហេតុ កម្លាំងជំនាញបានចុះទៅដល់កន្លែងកើតហេតុ វាស់វែងធ្វើកំណត់ហេតុ ប្រគល់សាកសព ឲ្យក្រុមគ្រួសារ ។ ចំណែកវត្ថុតាងបាននាំយកមករក្សាទុក នៅអធិការដ្ឋាននគបាលស្រុក ដើម្បីចាត់ការតាមនីតិវិធី៕